ბულგარეთის საფეხბურთო ნაკრები თბილისის ერთ-ერთ გვირაბში ავარიაში მოყვა. ბულგარელების ერთ-ერთი ვარსკვლავი ტოდორ ნედელევი დაშავდა.
ამბები.ჯი-ს ინფორმაციით, მძღოლმა გვირაბში მკვეთრად დაამუხრუჭა და შეჯახება ამ დროს მოხდა. ნედელევს მინის ნამსხვრევები სახესა და ხელზე მოხვდა და დაუსისხლიანდა. ის სამედიცინო დახმარების აღმოსაჩენად და გამოკვლევის ჩასატარებლად საავადმყოფოში გადაიყვანეს. მასთან ერთად გუნდის ექიმი იმყოფება.
,,ბულგარეთის ეროვნული ნაკრები, თბილისში ჩასვლის შემდეგ, მძიმე ავარიაში მოხვდა. გზად სასტუმროსაკენ ორი ავტობუსიდან პირველის მძღოლმა მართვის კონტროლი დაკარგა, რამაც სერიოზული ავარია გამოიწვია. შეჯახების შემდეგ ტოდორ ნედელევი საავადმყოფოში გადაიყვანეს, სადაც საფუძვლიანი გამოკვლევა უტარდება. გუნდის ყველა დანარჩენი წევრი და პერსონალი კარგადაა”, – ნათქვამია ბულგარეთის ფეხბურთის ფედერაციის განცხადებაში.