,,სარკე”, გიორგი საკარული
მსახიობ ნინუცა მაყაშვილს ორჯერ მოუწია ძალიან რთული მდგომარეობიდან გამოსვლა და ორივეჯერ დიდი ფიზიკური ძალების დახარჯვა მოუხდა. წარსულიდან ცუდი მოგონებების შემოტევებს თავისი მეთოდით უმკლავდება – ფეხით ყოველდღე დიდ მანძილს გადის და, როგორც ამბობს, ამით ტვინს ინიავებს. ჯანსაღი ცხოვრების წესი მისთვის ნაცნობია და, როგორც გვითხრა, რთულ პერიოდებში სწორედ ეს გამოადგა:
– ფეხით სეირნობა ძალიან მიყვარს. ფიქრებს და ცუდ ხასიათს ამით ვშველი. ჯანსაღი ცხოვრების წესი მქონდა. ვვარჯიშობდი – ერთი დღე მქონდა ცურვა, ფიტნესი და მერე გადავედი კრივზე, მაგრამ ჯანმრთელობის პრობლემების გამო თავი დავანებე, რადგან არანაირი ფიზიკური დატვირთვა არ შეიძლებოდა.
— რატომ გსტუმრობენ ცუდი ფიქრები? რა მოხდა თქვენს წარსულში?
– სასწაულად რთული პერიოდი მქონდა, თან პატარა ასაკში. ბოლომდე ვერ გამოვედი მდგომარეობიდან, წარსულის ფიქრები ხშირად მაწუხებს. ცოტა ხნის წინაც მქონდა რთული პერიოდი, როდესაც თვენახევარში 21 კილო დავიკელი.
— ნერვიულობით დაიკელით?
– დიახ. დამემართა ძილქუში, არ მინდოდა ჭამა, ლოგინიდან ადგომა…
— რისგან იყო გამოწვეული ეს რთული პერიოდი?
– პირადი ცხოვრებით… რთული პერიოდებიდან ერთი ყოფილ მეუღლეს (ბესო ზანგური) უკავშირდებოდა და ერთი – ყოფილ შეყვარებულს.
— მეუღლესთან გაშორება მძიმე გადასატანია…
– ის პერიოდი ხმას არ ვიღებდი, თავს არ ვშველოდი და სულ მინდა, დღევანდელმა ნინუცამ იმ ნინუცას სახეში შემოსცხოს… ჩემი ყველაზე დიდი მინუსია, რომ შემიძლია ადამიანს ათასჯერ ვაპატიო.