გუშინ გურჯაანში დატრიალებულმა ტრაგედიამ მთელი საქართველო შეძრა. 36 წლის კაცმა 25 წლის ცოლს ფიზიკური შეურაცხყოფა მიაყენა. ქალს ამ დროს ხელში 8 თვის შვილი ეჭირა. ბავშვმა გონება დაკარგა და გარდაიცვალა. ბავშვის დედამ ,,პირველთან” თავს დატეხილ უბედურებაზე მოუყვა:
-ხელიდან რომ გამომგლიჯა, ეტყობა, ეგეთ არტერიაში მოარტყა… ანუ ახალი ნაჭამი ჰქონდა და ეტყობა, ყელში მოუხვდა და გაგუდა. აიყვანა და აჯანჯღარებდა. მე განწირული ხმით ვყვიროდი, ხალხო, მიშველეთ. არავინ მიშველა…განწირული ხმით ვყვიროდი, მეზობლებო, მიშველეთ-მეთქი და არავან მომეშველა… ბავშვი მამამ მოკლა…
,,შინაგან საქმეთა სამინისტროს კახეთის პოლიციის დეპარტამენტის თანამშრომლებმა, ოჯახში ძალადობის ფაქტზე, 1985 წელს დაბადებული ზ.შ. გურჯაანის მუნიციპალიტეტში დააკავეს.
მცირეწლოვანი ბავშვის გარდაცვალების მიზეზის დადგენის მიზნით დანიშნულია შესაბამისი ექსპერტიზები. მომხდარ ფაქტზე გამოძიება სისხლის სამართლის კოდექსის 126-ე პრიმა მუხლით მიმდინარეობს”, – წერია შსს-ს განცხადებაში.