,,ეს გახლავთ გვერდითი ამიოტროფიული სკლეროზი. ეს არის ძალიან იშვიათი დაავადება. მსოფლიოში გავრცელების ძალიან დაბალი პროცენტია, ამავე დროს, ზურას შემთხვევაში, ძალიან აგრესიული ფორმაა, რომელიც საკმაოდ სწრაფად პროგრესირებს. ექიმები ვერაფერს ამბობენ… როცა ვეკითხებით, რა ვქნათ, გვპასუხობენ, რომ ეს ყველაფერი უფლის ნებაა. ყველაფერს უკეთებენ, რისი გაკეთებაც კი შეიძლება. სამწუხაროდ, მისი დიაგნოზი არ იძლევა საშუალებას, რომ გამოჯანმრთელებისკენ წავიდეს. უკვე 9 თვეა, რეანიმაციაში აპარატზეა შეერთებული”, – უყვებოდა მომღერალ ზურა დოიჯაშვილის ცოლი, ქეთი ვადაჭკორია ,,სარკეს” 2 თვის წინ.
სამწუხაროდ, ზურა დოიჯაშვილი 14 თებერვალს გარდაიცვალა. ქეთი ვადაჭკორია 2 თვის წინ,,სარკეს” უამბობდა:
– სანამ ლაპარაკი შეეძლო, სულ ამბობდა, რომ ისე არ წავიდოდა ამქვეყნიდან, საქართველოში არ დაბრუნებულიყო, სანამ მისი მდგომარეობა კრიტიკულად დამძიმდებოდა და ფიზიკურად იყო საშუალება, რომ გადმოგვეყვანა საქართველოში, ვერ მოვახერხეთ. ძალიან სწრაფად დამძიმდა და აპარატზე შეაერთეს.
ვერ იყო კარგად, ფილტვები აწუხებდა, წონაში კლება, სისუსტე დაეწყო, სახსრები სტკიოდა, მოძრაობა უჭირდა… როცა სახლიდან გაგვყავდა სასწრაფოთი, მაშინ მისი ბოლო წინადადება იყო: „დავიჯერო, ისე წავალ ამქვეყნიდან, რომ თბილისში ფეხს ვერ დავადგამ?“
– ნანობდა საქართველოდან წასვლას?
– ყველამ იცის საქართველოდან ჩვენი წამოსვლის მიზეზი ზურას არ უნდოდა პრობლემებით ვინმეს შეწუხება. აქ ვმუშაობდით, რომ მერე დავბრუნებულიყავით.
– მოაგვარეთ ბინის პრობლემა?
– ვერა და ისევ არ გვაქვს თბილისში სახლ-კარი.. ერთი წელი გახდება, რაც ზურას ეს მდგომარეობა აქვს და ამიტომ ბინა გადავიდა სხვა ხარისხში, აღარ გვაქვს საშუალება, მე და ჩემმა შვილებმა ბინა შევიძინოთ, შესაბამისად, ჭერი არ გაგვაჩნია.