სამართალდამცველებმა ცხელ კვალზე ჩატარებული ოპერატიულ-სამძებრო და საგამოძიებო მოქმედებების შედეგად, 1999 წელს დაბადებული გ.ა. ოჯახის წევრის მიმართ ჩადენილი განზრახ მკვლელობის ბრალდებით დააკავეს. ამის შესახებ ინფორმაციას შსს ავრცელებს.
მათივე ინფორმაციით, დანაშაული 7-დან 15 წლამდე ვადით თავისუფლების აღკვეთას ითვალისწინებს.
„გამოძიებით დადგინდა, რომ ბრალდებულმა ძმას, 2001 წელს დაბადებულ მ.ა.-ს, ურთიერთშელაპარაკების ნიადაგზე, ცივი იარაღის გამოყენებით სხეულზე ჭრილობა მიაყენა. დაჭრილი კაცი სასწრაფო სამედიცინო დახმარების ჯგუფმა საავადმყოფოში გადაიყვანა, თუმცა მისი გადარჩენა ვეღარ მოხერხდა.
სამართალდამცველებმა დანაშაულის ჩადენის იარაღი, დანა ნივთმტკიცებად ამოიღეს.
ოჯახის წევრის მიმართ ჩადენილ განზრახ მკვლელობის ფაქტზე გამოძიება საქართველოს სსკ-ის 11 პრიმა-108-ე მუხლით მიმდინარეობს“, – ნათქვამია განცხადებაში.
მოგვიანებით ცნობილი გახდა, რომ მოკლული ბიჭი მიშო ახლოურია, რომელიც საფეხბურთო კლუბ ,,საბურთალოში” თამაშობდა. ის მოკლული გიორგი შაქარაშვილის ახლო მეგობარი იყო.
მიშო გიორგი შაქარშვილზე ხშირად აქვეყნებდა პოსტებს და მის სიკვდილს ძალიან განიცდიდა.
,,ჩემი გადაღებული ფოტო, ჩემი შაქარა და ჩემი ლუსი, რა კარგი იყავი, შაქარ…”, ,,შაქარ, მენატრები, ძალიან მენატრები, როგორი რთულია უშენობა. როგორი რთულია იმაზე ფიქრი, რომ ვეღარ შეგხვდები ამ დედამიწაზე, მიუხედავად იმისა, რომ სულ შენ გეძებ, სულ შენზე ვფიქრობ.
ძალიან მიყვარხარ, ერთი იმაზე ფიქრი მაძლიერებს, რომ ახლა უკეთეს ადგილას ხარ და ზემოდან გვიყურებ. ჩემი ანგელოზი ხარ, შაქარ. ზეცაში აუცილებლად შევხვდებით და იქ მოგვიწევს იმის გაკეთება, რაც ამ უსამართლო ცხოვრებამ არ გვაცადა” – წერდა მიშო ახლოური.
,,არ მჯერა, მიშო…” – დაწერა გიორგი შაქარაშვილის დამ, ანა შაქარაშვილმა.