კორონავირუსის დიაგნოზით გარდაცვლილი 19 წლის თეკლა თორდიას მამის, რატი თორდიას განცხადებით, მის შვილს თანმხლები დაავადება შაქარიანი დიაბეტი აღენიშნებოდა.
რატი თორდიას ინტერვიუს Ambebi.ge ავრცელებს.
„ჩვენ მთელი ოჯახი ინფიცირებულები ვიყავით, მაგრამ ვინაიდან თეკლას ჰქონდა შაქრიანი დიაბეტი, მასზე ვიყავით მთლიანად გადართულები. სულ იზომავდა შაქარს, დღეში რამდენჯერმე. ხანდახან კი აუწევდა, მაგრამ შემდეგ ისევ ნორმაში ბრუნდებოდა და მდგომარეობა იყო მსუბუქი. მეექვსე დღეს დაეწყო ხველა, მოემატა ტემპერატურა, შაქრის მაჩვენებელსაც ვერ ვარეგულირებდით. დავურეკეთ ოჯახის ექიმს და მოვითხოვეთ კლინიკაში გადაყვანა. ჯერ არც გვიპასუხა წესიერად, არ მცალია ახლაო და შემდეგ არ პასუხობდა ჩვენს ზარებს. შემდეგ სხვა ოჯახის ექიმი ჩავრთეთ საქმეში და მან გვითხრა, რომ არცერთ კლინიკაში ადგილი არ იყო და ერთადერთი, რაც შეეძლოთ, კოვიდ-სასტუმროში გადაყვანა იყო“,-აცხადებს რატი თორდია.
მისივე თქმით, მკურნალობის პროცესში “რემდესივირის” ჩართვა ითხოვეს, რაზეც აუხსნეს, რომ უკუჩვენება ახასიათებს.
“კოვიდ სასტუმროში გადაყვანიდან მეორე დღეს მძიმედ იყო უკვე, წაიყვანეს ანალიზებზე, სპეციალური “მარშუტკები” ჰყავთ ამისთვის. უკანა გზაზე საცობში გაჭედილან. ბავშვი ისედაც ძლივს სუნთქავდა, ჟანგბადის აპარატი იქ არ ჰქონდათ და კიდევ საცობში იდგა იმდენი ხანი. “მარშუტკიდან” მწერდა, მამიკო, ხელები სულ გამილურჯდა, გული მიმდის და არ ვიცი, როგორ ჩამოვალ ან ჩამოვალ კი საერთოდ ამ “მარშუტკიდანო”. ესენი მე მომკლავენ, უკეთესობას ვერ ვხედავ და არაფერს არ მიკეთებენ ისეთსო”, -აცხადებს რატი თორდია.
მისივე თქმით, გოგონა უეცრად დამძიმდა და აპარატზე შეაერთეს.
“თავიდანვე შეგვამზადეს, გვითხრეს მდგომარეობა მძიმეა, 2 საათი ვუკეთებდით ხელოვნურ სუნთქვას, მაგრამ შედეგი არაფერიაო. 5 დღე იყო აპარატზე შეერთებული. ამ პერიოდში დაუწიეს შაქარი, პერიოდულად ტემპერატურაც, მაგრამ მაინც ვერ გადაარჩინეს. სავარაუდო მიზეზი გახდა თრომბოემბოლია, – ამბობს რატი თორდია.