სამართალდამცავებმა ამერიკის შეერთებული შტატების ვიზის დამზადების სანაცვლოდ დიდი ოდენობით თანხის თაღლითურად დაუფლების ბრალდებით საქართველოს ორი მოქალაქე დააკავეს. გამოძიებით დადგინდა, რომ ისინი მოტყუებით იყენებდნენ ცნობილი ადამიანების სახელებს, ფარულ ჩანაწერში ისინი ახსენებენ პროდიუსერ ნოე სულაბერიძისა და ტელეწამყვან გიორგი ჯაჯანიძის სახელებს.
დაკავებული მამაკაცი გია სურამელაშვილის ახლო მეგობარი, ღონისძიებების ორგანიზატორი და მომღერალი ჯიმი მაქაცარიაა.
შსს-ს ცნობით, დაკავებულებმა საქართველოს მოქალაქე მოატყუეს, რომ ამერიკის ვიზის მიღებაში დაეხმარებოდნენ, რისთვისაც მოსთხოვეს 17.000 დოლარი, საიდანაც 8.500 დოლარი წინასწარ ჩაარიცხვინეს.
გია ჯაჯანიძე: “ეს ამბავი დიდი ხანია ვიცოდი, თავიდან შოკში ჩავვარდი, ადამიანები მირეკავდნენ და მეუბნებოდნენ, წაგვიყვანეთ ამერიკაშიო. ხშირად თანხის დაკლებაზეც კი დაურეკავთ. ერთხელ ქალმა რომ დამირეკა, ვკითხე, რა გითხრეს, რამდენს ვიღებ-თქო და 20 ათას დოლარს და იქნებ დამიკლოო. ბოლო დროს ამერიკის ელჩთან ჩავწერე ინტერვიუ ხარაგაულში და რომ ნახეს ტელევიზიით, უფრო დაიჯერეს.
ნოე სულაბერიძე: “მადლობა მინდა გადავუხადო შინაგან საქმეთა სამინისტროს. პირველად გავიგე ამ თემაზე, ჩემამდე არავინ მოსულა და არავის დაურეკავს. მიხარია, რომ ჩემ სახელსა და რეპუტაციას ზიანი არ მიადგა და ყველაფერი გამოაშკარავდა. არ ვიცნობ მაგ დაკავებულ ადამიანს, მითხრეს, გია სურამელაშვილის ყოფილი პროდიუსერიაო. სურათზე რომ მაჩვენეს, ვერ ვიცანი”.
გია სურამელაშვილი: “მე ვიცნობ ჯიმი მაქაცარიას, პროდიუსერი არ ყოფილა ჩემი, ვახლობლობდით, კარგი მეგობარი იყო, ცოლი ჰყავს, ავადმყოფი დედა და ორი ბავშვი. როგორც მეგობარი – გადასარევი, ტკბილი ადამიანია. ნაქირავებ ბინაში ცხოვრობს. რაიმე შემოსავალი თუ ჰქონდა, კეთილსინდისიერად მიხდიდა ჰონორარს და გასტროლებზეც წავუყვანივარ.
გუშინ დამირეკეს, პოლიცია დაადგა და ჯიმი აიყვანესო. ბოლო დროს თავადაც დაიწყო სიმღერა. ძალიან დიდი სიყვარულით სარგებლობს მეგობრებში და ახლობლებში და გაოგნებულები ვართ, როგორ გაეხვა ამ მაქინაციებში”.
ამბები