რაულ ჩავლეიშვილს უდიდესი ტრაგედია დაატყდა თავს, ერთ ღამეში ოჯახის 4 წევრი დაკარგა. ეს მოხდა 2008 წელს.
-ისეთი ჭექა-ქუხილი და თავსხმა წვიმა იყო. იმ ღამით შინ არ ვიყავი, ბათუმში ვმუშაობდი, პარკში, გვიანობამდე შევფერხდი და ჩემს დასთან დავრჩი. შინ რომც ვყოფილიყავი, გადავრჩებოდი, ისევე, როგორც გადარჩა მამაჩემი – ილია ჩავლეიშვილი, რადგან ჩვენი საძინებელი ოთახი სახლის სხვა მხარეს იყო. ჩემი ძმისა და რძლის, ასევე, მათი შვილების ორი საძინებელი კი მეორე მხარეს მდებარეობდა. 1000-1500 ტონამდე მიწა ჩამოწვა მანდ და სწორედ ის საძინებელი ოთახები ჩაიტანა და ჩამარხა მიწაში.
ჩემი ოჯახიდან ძმა ჯუმბერი, რძალი ნანული და მათი ორი შვილი – 12 წლის ალეკო და 14 წლის ქეთი დაიღუპნენ. მესამე ძმისშვილი – 18 წლის მაგდაც იქ იყო, ქეთის გვერდით ლოგინში ეძინა, მაგრამ გადარჩა. მაგდა 5 საათის განმავლობაში იყო მიწის ქვეშ ჩამარხული, მაგრამ, საბედნიეროდ, საიდანღაც ჰაერი აღწევდა და ამან გადაარჩინა. რომ ამოვიყვანეთ, ფიზიკურად არაფერი დაზიანებია, მაგრამ შოკში იყო. კარგა ხანს გამოჰყვა დეპრესია, – ყვება რაულ ჩავლეიშვილი ამბები.ჯი-სთან.
მაგდა დღეს უკვე დედაა და ღმერთს მადლობას სწირავს, რომ თავისი ოჯახის მოსაგონრად გადარჩა. მან ხელვაჩაურის მუნიციპალიტეტის სოფელ ქვედა ჯოჭოში ჩამოწოლილ მეწყერში დაღუპული თედორაძეების ოჯახის გადარჩენილი ერთადერთ წევრს, თიკა თედორაძეს მიუსამძიმრა. ,,გახსოვდეს რომ გაძლიერდე, ისევ მათ გამო! მე შენი ტკივილი მტკივა”, – დაწერა მაგდა ჩავლეიშვილმა.