მსაიხიობი გიორგი გურგულია 5 წლის წინ ,,სარკესთან” თავისი ცხოვრების მნიშვნელოვან ეტაპზე ყვებოდა, როგორ შეხვდა 20 წლით უმცროს, შვილისტოლა ლარისა გიგაურს, როგორ შეუყვარდათ ერთმანეთი და როგორ იქორწინეს. მათ საერთო შვილი, მარინოლა ჰყავთ. გიორგიმ ქალიშვილს სახელი მამიდის, მუსიკოს ინოლა გურგულიას პატივსაცემად დაარქვა. გიგაური მისი მეოთხე ცოლი იყო, წინა ქორწინებებიდან სამი ვაჟი ჰყავს და შვილიშვილები ჰყავს. მისი პირველი მეუღლე პოეტ მორის ფოცხიშვილის ქალიშვილი, მხატვარი თამარ ფოცხიშვილი იყო.
გიორგი გურგულიას მეოთხე ქორწინებაც უიღბლო აღმოჩნდა, წყვილი 1 წლის წინ ერთმანეთს გაშორდა. ზაფხულში ყოფილმა ცოლმა მსახიობს უჩივლა და ამის გამო საპატიმროშიც იჯდა. საქმეს სასამართლო განიხილავს.
მსახიობი ამბობს, რომ უდანაშაულოა და ქალიშვილის დედაზე არასოდეს უძალადია. ამ ყველაფერს კი ყოფილი ცოლის ყოფილ დაქალს აბრალებს.
-იმ გოგომ საჩივარში სისულელე ჩააწერინა. „ნაცია“ და თან რამდენიმე თვის წინ დამემუქრა, შენ ნახე, თუ არ გაგამწაროო. საჩივარში დააწერინა, რომ მე ხუთი წლის წინ ბავშვის თანდასწრებით ვითომ ხელი დავარტყი. მოიგონა ეს ამბავი. რა თქმა უნდა, ტყუილია. ნაცები საარჩევნოდ მიჩალიჩებენ.
იმ დღეს იქ ვიყავი მისული, ბავშვი არ იძინებდა, ჩემმა მეუღლემ მომაყენა შეურაცხყოფა, გავბრაზდი და ვუთხარი, ჩემი ნაჩუქარი ტელეფონი დაებრუნებინა. მომცა ეს ტელეფონი და შემდეგ დამემუქრა, დღესვე თუ არ დამიბრუნებ, ნახე, რას გიზამო და პოლიციაში გაუკეთებია განაცხადი.
დამიბარეს ძველი თბილისის განყოფილებაში, 30 ივლისს დამაკავეს, 2 აგვისტომდე ვიჯექი გლდანის ციხეში. მომცეს ერთთვიანი შემაკავებელი ორდერი, რომელსაც ვადა გაუვიდა. იმის შემდეგ ცოლს ზღვაზეც ჩავაკითხე და ჩამოვიყვანე. არანაირი პრობლემა არ არის, ყოფილი მეუღლეც გაკვირვებულია.
იცავენ ქალის უფლებას, ბავშვის, ძაღლის, ცხოველის და მამაკაცის უფლების დამცველი არ არსებობს. ახლა გადავწყვიტე, რომ გავაკეთო ორგანიზაცია, რომელიც მამაკაცთა უფლებებს დაიცავს. ნებისმიერი ტყუილი შეიძლება დაგაბრალონ. არანაირი ექსპერტიზა არ სჭირდება და არც მოწმეა საჭირო, შეიძლება დაგაპატიმრონ არაფრის გამო, – ყვება გიორგი გურგულია ,,ფორტუნასთან” და ,,პრაიმტაიმთან”.
გიორგი გურგულია ყველა ინტერვიუში აღნიშნავს, რომ ყოფილ ცოლებთან მეგობრობს. ის ქალებზე, შვილების დედებზე სხვადასხვა ინტერვიუებში ყვება:
-ლარისა ჩემი მეოთხე მეუღლეა. ახლა 30 წლის გახდა, ჩემი უფროსი ვაჟის ტოლია. ქალიშვილი შეგვეძინა. სამი ვაჟი მყავს და გოგონაზე ყოველთვის ვოცნებობდი. ეს რაღაც ახალი, დიდი და ძალიან სასიამოვნო პასუხისმგებლობაა. სულ ვცდილობ, სახლში დროზე მივიდე და პატარას ყურადღება მივაქციო…
მამაკაცები ქალებისთვის ყოველთვის საინტერესოები უნდა იყვნენ. ქალთან ურთიერთობაში კაცმა აუცილებლად უნდა დაიცვას ბარიერი. ნებისმიერი უხეშობა ქალს ძალიან ამახსოვრდება. ასი გაკეთებული სიკეთე შეიძლება ერთი უხეშობით დაანგრიო.
ყველაზე მთავარი კი ცოლ-ქმრის ურთიერთობაში მეგობრობაა. თვალთმაქცობასა და ტყუილს, ჯობია, ცოლს სიმართლე უთხრა…
როგორც მეგობარი, ყველა მეუღლე მიყვარს. უბრალოდ, ჩვენ შორის საწოლი აღარ არსებობს. ისინი ჩემთვის გამორჩეული ადამიანები არიან, როგორც ჩემი შვილების დედები… ქალს კაცი ფიზიკურად რომ შეეხება, ეს ყველაფერს ანგრევს. ძველი ურთიერთობის აღდგენა ამ შემთხვევაში ძალიან რთულია. ამიტომ ყველა კაცს ვურჩევ, სიფაქიზის გრძნობა დაიცვან. როცა ადამიანი სიყვარულს ტოვებ, რთულია. არ მესმის ისეთი ოჯახების, რომ შორდებიან და შვილს არ აჩვენებენ ერთმანეთს.