დები ხაჩატურიანები, კრისტინა, ანგელინა და მარია, სასამართლოს ვერდიქტის მოლოდინში არიან. მშობლები.ჯი-ს ინფორმაციით, საგამოძიებო სამუშაოები უკვე დასრულდა. უფროსები დები მამის, მიხაილ ხაჩატურიანის განზრახ მკვლელობაში ბრალდებულად ცნეს, უმცროსმა კი იძულებითი მკურნალობა უნდა გაიაროს. ის შეურაცხადად იქნა მიჩნეული ბოროტმოქმედების ჩადენის მომენტში. მისი საქმე ცალკეა გამოყოფილი.
გოგონების დაცვის მხარე კვლავ ამტკიცებს, რომ გოგონები მხოლოდ და მხოლოდ საკუთარ სიცოცხლეს იცავდნენ მამის ძალადობისგან და აპირებენ, ნაფიცი მსაჯულები მოითხოვონ.
,,რადიო თავისუფლების” ინფორმაციით, ფიზიკური და ფსიქოლოგიური ტანჯვა, რომელსაც ხანგრძლივი პერიოდის განმავლობაში მამა აყენებდა, ბრალდებულებს შემამსუბუქებელ გარემოებად ეთვლებათ.
მკვლელობა 2 წლის წინ მოსკოვში მოხდა. 57 წლის მიხეილ ხაჩატურიანი საკუთარმა შვილებმა მოკლეს. პოლიციის ცნობით, კაცს მჩხვლეტავი ნივთებით რამდენიმე ჭრილობა აქვს მიყენებული და ასევე _ ჩაქუჩით მიყენებული დარტყმები თავზე.
გამოძიების ცნობით, კაცმა ბინიდან დაღწევა შეძლო, თუმცა სადარბაზოში სისხლისგან დაიცალა და გარდაიცვალა.
გამოცემა „მოსკოვსკი კომსომოლეც“ წერს, რომ მიხაილი შვილებს, კრისტინასა და ანგელინას მცირე ასაკიდან აუპატიურებდა. მტკიცებულებების მიხედვით, მან ერთ-ერთ ქალიშვილს განუცხადა: „შენ დედაშენის ადგილს დაიკავებ! ცოლად შეგირთავ და შვილს გამიჩენ!“
ამასთან, მამა შვილებს უბრძანებდა, მის წინ გაშიშვლებულიყვნენ, რათა კაცს ისინი „შეემოწმებინა“. გავრცელდა ფოტოც, სადაც ჩანს ანგელინას სისხლიანი სახე, რომელიც, სავარაუდოდ, მასზე თავდასხმის შემდეგ არის გადაღებული.
გოგონების თქმით, მკვლელობის დღეს მამის მანქანიდან მისი სანადირო დანა აიღეს, რათა საჭიროების შემთხვევაში თავდაცვისთვის გამოეყენებინათ. ამავე დანით მიხაილმა მანამდე ქალიშვილი მარია და გოგონების დედა, აურელია დაჭრა, რომელიც სახლიდან გაიქცა.
სასიკვდილო თავდასხმამდე ცოტა ხნით ადრე მიხაილმა შვილების მისამართით წიწაკის სპრეი გაუშვა. კრისტინამ, რომელსაც ასთმა აწუხებს, გონება დაკარგა, მამამ ის სააბაზანოში შეიყვანა, სამოსი გახადა და არაყი დაასხა. დის მდგომარეობით შეშინებულმა ანგელინამ და მარიამ გადაწყვიტეს, მიხაილს დანითა და ჩაქუჩით დასხმოდნენ თავს.
-არაფერს ვნანობ. შეუძლებელი იყო იმისი ატანა, რასაც ჩვენ გვიკეთებდა. ციხეში უკეთესია ცხოვრება, ვიდრე მასთან ერთად. 10 წლის ასაკიდან გვცემდა, 14 წლიდან – სექსუალურად ძალადობდა, – აღნიშნა ანგელინამ.