14 მარტს რუსმა კომპოზიტორმა, იგორ კრუტოიმ, საკუთარ დას, ალას 60 წლის იუბილე გადაუხადა და ამისთვის 5 მილიონი რუბლი დახარჯა. დაბადების დღეზე რუსმა პოლიტიკოსებმა და შოუბიზნესის წარმომადგენლებმა კარგად მოილხინეს. თუმცა, როგორც ახლახან გაირკვა, მდიდრული წვეულება შეიძლება ზოგისთვის საბედისწერო აღმოჩნდეს.
საქმე ის არის, რომ იუბილეზე იმყოფებოდა რუსეთის სახალხო არტისტი, 78 წლის ლევ ლეშენკო, რომელსაც კორონავირუსი დაუდასტურდა. ეს ყველაფერი არ არის, მანამდე ლეშენკომ სხვა დაბადების დღეებსა და ტელეშოუებშიც იარა. ახლა ვისაც კი მასთან შეხება ჰქონია და ასეთი ბევრია, თვითიზოლაციაში არიან.
ლეშენკო და მისი ცოლი ჯერ ამერიკასა და კანადაში იყვნენ, მერე – საფრანგეთში და იქიდან მოსკოვში ჩაფრინდნენ. საქართველოსგან განსხვავებით, იქ აზრად არავის მოსვლია, რომ სარისკო ქვეყნებში მოგზაურობის შემდეგ ადამიანები აეროპორტიდანვე თვითიზოლაციაში ან კარანტინში გადაეყვანათ.
ახლა კი პანიკაშია ყველა ის პირი, რომლებიც მდიდრულ წვეულებას ესწრებოდნენ, მაგალითად, ფილიპ კირკოროვი, ოლეგ გაზმანოვი, ნიკოლაი ბასკოვი, ალექსანდრ სეროვი, ირინა ალეგროვა, ალსუ და სხვები.