სენაკის მუნიციპალიტეტში, სოფელ ნოსირთან მომხდარ ავტოსაგზაო შემთხვევას ორი ადამიანი ემსხვერპლა. ერთმანეთს ორი ავტომობილი შეეჯახა, რომლებსაც ცეცხლი გაუჩნდათ. ერთ-ერთ მანქანაში მსხდომებმა გადმოსვლა მოასწრეს და ისინი მსუბუქად არიან დაშავებული.
ადგილობრივების ინფორმაციით, ორივე მანქანა გაზზე იყო. შინაგან საქმეთა სამინისტროს ინფორმაციით, ფაქტზე გამოძიება 276-ე მუხლის, მე-8 ნაწილით მიმდინარეობს.
ამბები.ჯი-ს ინფორმაციით, გარდაცვლილები 21 წლის შოთა მაჩიტიძე და 25 წლის ვალერი თუშიაშვილი არიან. მაჩიტიძე წარმოშობით თერჯოლის რაიონის სოფელ თუზიდან იყო.
როგორც ადგილობრივმა განაცხადა, მან სკოლა სოფელში დაამთავრა, შემდეგ კი საცხოვრებლად თბილისში გადავიდა. მისი თქმით, თუზში ახალგაზრდა იშვიათად ჩადიოდა და ადგილობრივებს მასთან ხშირი კონტაქტი არ ჰქონდათ.
გარდაცვლილების ახლობლები ყვებიან, რომ შოთა მაჩიტიძე და ვალერი თუშიაშვილი სამი თვით ქობულეთში სამუშაოდ იყვნენ ჩასულები. ავტოსაგზაო შემთხვევა იმ დროს მოხდა, როდესაც იქიდან ბრუნდებოდნენ.
ახალგაზრდების გარდაცვალებას მათი მეგობრები ფეისბუქით ეხმაურებიან:
,,ღმერთო ჩემო, უბრალოდ რამხელა ტკივილი ხარ, შოთიკო, გუშინ ვნახე ქობულეთში და სიხარულით და ,,ღადაობით” გავატარეთ გუშინდელი დღე… ჩემი ნაცნობი გამოჩნდა ძლივს-თქო. კი მითხრა, ხვალ ვაპირებ იქით წამოსვლასო მაგრამ რა ვიცოდი, დღეს ეს თუ დაგემართებოდ, ჩემო ძმაო”, – წერს შოთიკო მაჩიტიძის მეგობარი.
ამბები.ჯი