ცნობილმა ისტორიკოსმა და გამომცემელმა ბუბა კუდავამ გუშინ გაავრცელა წერილი, რომ მისი მეუღლე და შვილები, 3 წლის ტყუპი გოგონები, თუთა და მარია, სტეფანწმინდის სასტუმროდან გამოყარეს. მიზეზი კი ხმაური იყო. როგორც ისტორიკოსი წერს, სასტუმროს მეპატრონემ მის ცოლს უთხრა, რომ უცხოელ ტურისტებს ელოდებოდა და ამ ხმაურის გამო ცუდ კომენტარებს დაუწერდნენ.
ამ პოსტის მერე მართლაც უარყოფითი კომენტარების ქარიშხალი ატყდა. ეს წერილი სასტუმროს ლინკთან ერთად უამრავმა ადამიანმა გააზიარა.
სასუმროს მეპატრონემ ბუბა კუდავას პოსტის საპასუხო წერილი გამოაქვეყნა.
,,მე ვარ ეთერ პაპიაშვილი, იმ სასტუმროს დიასახლისი, რომელზეც ბუბა კუდავა თავის პოსტში წერს. რადგან სიცრუეს წერს და ამის გამო უამრავ ადამიანს ჩემს წინააღმდეგ ამხედრებს და მიზანმიმართულად ცდილობს ჩემი ბიზნესის დასამარებას, უბრალო ადამიანის განადგურებას, გადავწყვიტე, მოგიყვეთ, რა როგორ იყო.
პედაგოგი ქალი ვარ, როგორ შეიძლება მძულდეს ბავშვები? ჩემს სასტუმროში ბუბა კუდავას ცოლ-შვილი კი არ შემოსულა პირველად, ხშირად ვმასპინძლობ ოჯახებს, მსგავსი შემთხვევა არავისთან მქონია, არც ის მგონია, ვინმემ აუგი თქვას ჩემზე, ვინც ჩემთან ისვენებდა. ბავშვები რომ შემოვიდნენ ჩემს სასტუმროში, მოვეფერე, ძალიან საყვარლები და მართლა ძალიან კარგი ბავშვები არიან, უბრალოდ, ხმაურობდნენ. უცხოელმა დამსვენებლებმა შენიშვნა მომცეს.
ამის შემდეგ ვთხოვე ლიკას, ლიკა, გეხვეწები, იქნებ, როგორმე ბავშვები ცოტა მაინც დაამშვიდო, ტურისტები გამექცევიან-მეთქი. ყველა დამსვენებელს ვცდილობ, გავუფრთხილდე, ვთხოვე, იქნებ ოდნავ დაამშვიდო-თქო, რაზეც გაღიზიანდა. ტურისტები რომ სამზარეულოში შევიდნენ, ამ სიტყვის პირდაპირი მნიშვნელობით, შევარდა სამზარეულოში და თავისი ნივთები მიაწყო გაღიზიანებულმა ისე, რომ მერე მე მკითხეს ტურისტებმა, ჩვენ ვაწყენინეთ რამე? რამე ხომ არ დავაშავეთო?
ისევ წივილი, ისევ კივილი, ისევ ვთხოვე, იქნებ დაამშვიდო ბავშვები-მეთქი და როგორ დავამშვიდო 3 წლის ბავშვებიო, მთავარი ის იყო, რომ არ ცდილობდა, არ შეიწუხა თავი, ყურადღება მიექცია ბავშვებისთვის.
მეორე დილას დამიძახა, აქ დამრჩენი მე არა ვარ, მიშოვეთ სხვა ადგილი და გადავალო. ვუთხარი, ვისთან მიგიყვანო და რა ვუთხრა იმას, ჩემთან ხმაურობენ ძალიან, სხვებს აწუხებენ და შენ მიიღეო? ეს ვუთხრა-მეთქი? იყავით აქ, უბრალოდ იმას გთხოვ, ბავშვებს მეტი ყურადღება მიაქციე, თორემ ბავშვის ხმაური რა სალაპარაკოა. ამ დროს ამიტეხა წივილი, კივილი, შენ იცი, საერთოდ ვინ ვარო? იცი, რას წარმოვადგენო? ვთხოვე, ნუ ყვირი, დამსვენებლებთან უხერხულია, ნუ ყვირი-მეთქი და არ მაინტერესებს შენი დამსვენებელიო.
მის ყვირილზე მოვიდნენ მეზობლები, ახლა მათ დაუწყო ლანძღვა, თქვენ ვინ გეკითხებათო. მეც გამოვედი წყობიდან, არაფრით გაჩერდა. გავარკვიე მერე, რომ გერგეტშია ადგილი და იქ არ მინდა, არ მეკადრებაო, მანდ ტყეში რა მინდაო. რომ აღარ მშვიდდებოდა, ჩემს მეზობელთან დავაბინავეთ. თანხაც არ გამომირთმევია. მისი მამა მერით მაშინებდა, ახლა მე შენ მერს მოგიყვანო, მითხრა.
ცუდად ვარ, ბუბა კუდავას პოსტის მერე, ისეთები ხდება, არ ვიცი, ამას თუ გადავიტან. როგორ შეგიძლიათ მოექცეთ ასე ადამიანს.?
რადგან ბუბა კუდავას მეუღლე, ლიკა, მემუქრებოდა ნახავ, რასაც გიზამო, ამიტომ დაწერეს ამ ფორმით და შინაარსით, საზოგადოებისთვის, ისევე როგორც ჩემთვის, ბავშვების თემა მგრძნობიარეა და შესაბამისი რეაქციაც მოჰყვა.
თუთა მარიამის მამა, ცრუობ. გამიხარდებოდა, სიმართლის გარკვევა რომ გეცადათ”, – დაწერა სასტუმროს მეპატრონემ.