,,წკაპ! რაღაცები უნდა გააჩერო, გაწყვიტო, რომ ახალს მისცე ბიძგი”, – ამბობდა ნიკა გუჯეჯიანი, რომლის სიცოცხლეც რამდენიმე საათის წინ შეწყდა. ის გომბორი-თბილისის დამაკავშირებელ გზაზე მომხდარ ავარიას ემსხვერპლა. შემთხვევა შუამთის ტყესთან მოხდა. ნიკა გუჯეჯიანი 25 წლის იყო.
ნიკა გუჯეჯიანს სარეკლამო სფეროში კარგად იცნობდნენ. ის საქართველოს ბანკის კრეატიული დირექტორი იყო. მუშაობდა გრაფიკული დიზაინის მიმართულებით ცნობილ სარეკლამო კომპანიებში..
ნიკა გუჯეჯიანი იყო 3D პრინტერით დაბეჭდილი ქვევრის იდეის თანაავტორი. მან დავით მიზანდართან და გიორგი მამასახლისთან ერთად იპოვა ტექნოლოგია, რომელიც ქვევრს 3D-ში აშენებს. ახალგაზრდებმა ჰოლანდიაში მიაკვლიეს კერამიკოსს, რომელსაც დოქტორანტურა აქვს დაცული 3D პრინტერების შექმნაზე და 3D ტექნოლოგიით დაბეჭდილი პირველი ქვევრის პროტოტიპიც შექმნეს.
ამ ტექნოლოგიით ქვევრი რამდენიმე საათში იბეჭდება და უფრო მდგრადია.
ფეისბუქით მას უამრავი ადამიანი ემშვიდობება.
,,როგორ მიყვარხარ და როგორ ვერ ვიჯერებ, გუჯეჯ! უბრალოდ დაუჯერებელია ის, რაც ხდება…. შენ სულ იქნები სულსულსულ…”, მმასეთ დროს სრული ფრუსტრაცია მჭირს… ძალიან კარგი, ნიჭიერი, პოზიტიური ადამიანი დაგვაკლდა”, ,,უზომოდ მწყდება გული და მენანები…”, ,,დღეს მთელი დღეა ნიკაზე ვფიქრობ. როგორი უსამართლო და ერთი წამია ეს ცხოვრება! არ უნდა ხდებოდეს ასეთი ამბები. ტვინი მტკივა”, ,,დიდი დანაკარგი ქვეყნისთვის”, – წერენ ნიკა გუჯეჯიანის შესახებ.
შინაგან საქმეთა სამინისტროს ინფორმაციით, ავტოსაგზაო შემთხვევასთან დაკავშირებით გამოძიება სსკ-ის 276-ე მუხლის მეხუთე ნაწილით მიმდინარეობს, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა.