გუშინ გავრცელდა ინფორმაცია, რომ 87 წლის ვახტანგ გოგეშვილს ,,ევექსის” კლინიკის მედპერსონალი გულგრილად მოექცა და ოჯახის წევრებმა ის დაზიანებებითა და სისხლჩაქცევებით წაიყვანეს სახლში.
ამის შესახებ მოხუცის რძალი, ნათია წერეთელი წერდა: ჩემი მამამთილი სამი დღე გვყავდა ,,ევექსში”, საიდანაც დღეს ხელების დაზიანებით და სისხლის ჩაქცევებით წამოვიყვანეთ. ეს არის არაპროფესიონალიზმისა და გულგრილობის სამწუხარო რეალობა. ვინ იცის, რამდენი პაციენტია იქ ასეთ დღეში (სრულად იხილეთ მბულზე).
ვახტანგ გოგეშვილის ქალიშვილი, დიანა გოგეშვილი კი ამბები.ჯი-სთან ამ ამბის დეტალებს ყვება.
-მამას სკლეროზის ნიშნები აქვს და აკრძალა ჭამა, ძალიან ცოტას ჭამდა, ამიტომ გვინდოდა, გადასხმები გაეკეთებინათ და გამოკვლევები ჩაეტარებინათ, რომ ცოტა მომაგრებულიყო. 22 თებერვალს ,,ევექსში” დავაწვინეთ. ერთი დღე ,,ემერჯენსში” იწვა და ღამე გაუკეთეს კვლევები. გვითხრეს, რომ არის ინფარქტის ნიშნები, პლუს პნევმონია, მეორე დღეს კარდეოლოგიურ განყოფილებაში გადაგვიყვანეს… ისევ უკეთებდნენ ამ გამოკვლევებს და შემდეგ გვითხრეს, რომ არა ინფარქტი, არამედ მხოლოდ პნევმონია იყო. ყოველ დღე სხვადასხვა დიაგნოზს გვეუბნებოდნენ.
ძალიან დასუსტებულია, უნდა დაეხმარო რომ წამოჯდეს. რომ მივედი ჩურჩულით მკითხა, რა დავაშავე რომ დამაბესო, ამხსენი გეხვეწებიო. ავხსენი, რა თქმა უნდა, წამოვაჯინე, დავამშვიდე. რომ ვკითხე ექთანს და ექიმს, რატომ დააბით-მეთქი, მიპასუხეს, გარბოდაო. სად გარბოდა, როდესაც კაცი ვერ დგება დახმარების გარეშე?! შემდეგ ექიმმა მითხრა, ძალიან ბევრი პაციენტი გვყავს და ვერ დავუდგებით და ვერ მივაქცევთ ყურადღებასო და ამიტომ აბამენ, რომ იყვნენ დაწყნარებულები, – აღნიშნა დიანა გოგეშვილმა.
დაზიანებები ჯერ კიდურების გათავისუფლების მცდელობისას მიიღო, შემდეგ კი გადასხმების გაკეთებისას. დიანას თქმით, სამედიცინო პერსონალმა პაციენტს დაზიანებული ხელები რამდენიმე საათის განმავლობაში არ დაუმუშავა და მას სისხლი სდიოდა. ოჯახმა ვახტან გოგეშვილის სახლში წამოყვანის გადაწყვეტილება მიიღო.
..
,,ევექსის” ადმინისტრაციამ დღეს ამ შემთხვევასთან დაკავშირებით განცხადება გაავრცელა, რომელშიც ნათქვამია, რომ ისინი სრულად იზიარებენ პაციენტის ოჯახის წევრებისა და საზოგადოების აღშფოთებას და აცხადებენ, რომ ამ ფაქტზე პასუხისმგებელი ყველა პირის მიმართ ძალიან მკაცრი დისციპლინური ზომები ტარდება.
გოგეშვილის ოჯახის წევრები მედპერსონალის გათავისუფლებასა და მათთვის ლიცენზიის ჩამორთმევას ითხოვენ.