ტელეჟურნალისტ ნუგზარ რუხაძეს წილად ხვდა ბედნიერება, მსოფლიო კინოვარსკვლავი, ოდრი ჰეპბერნი გაეცნო და მასთან ურთიერთობის საშუალება ჰქონოდა. ბატონი ნუგზარი ამ ბედნიერ შეხვედრას ასე აღწერს:
-ერთი სამუშაო დღის გატარება მომიხდა მასთან ერთად, როდესაც ის ატლანტაში ჩამოვიდა, როგორც იუნისეფ-ის წარმომადგენელი. მე ამერიკის ტელევიზიის სტუდიამ გამაგზავნა მასზე სიუჟეტის მოსამზადებლად. უკვე ხანში იყო შესული, თუმცა ის სინათლე და სათნოება სახესა და თვალებში მაინც შემორჩენილი ჰქონდა.
ეს იყო აბსოლუტურად დაუვიწყარი დღე! ისე თბილად მომექცა, იქამდე მივიდა საქმე, რომ სახელითაც მომმართავდა – ნუგ, ასე მეძახდა. ვერ გაიმეორებდა ჩემს ქართულ სახელს და შემოკლებით ვუთხარი, როგორც მეძახდნენ ტელევიზიაში. ფოტო შემთხვევით გადაიღო უცნობმა ფოტორეპორტიორმა და რამდენიმე კვირის შემდეგ მომიტანა – მომცა კონვერტით, როგორც სიურპრიზი.
ოდრი კაცობრიობის გლობალურ მეხსიერებაში ისეთი კლასიკაა, რომელსაც ასაკი არ შეეხო. მიუხედავად იმისა, რომ ჩვენი შეხვედრისას იყო ნაოჭებით სავსე, ძალიან გამხდარი, მას შემდეგ სულ რაღაც ერთ წელიწადში გარდაიცვალა… უნდა გითხრათ, რომ ეს იყო სინაზის ისეთი აღქმა, რომლის აღწერაც არ შემიძლია, ანუ იმას, რასაც ჩვენ კინემატოგრაფში ვგრძნობდით, მანამ ფიზიკურად გავიცნობდი მას, ეს ყველაფერი აღმოჩნდა მართალი.