,,ვაკვირდებით პროცესს, რომელიც მიზნად ისახავს თვითდაზიანებას იმისთვის, რომ ჯანმრთელობის მდგომარეობა უფრო მეტად გართულდეს, რის სანაცვლოდაც უნდა იყოს მოპოვებული თავისუფლება, – ამის შესახებ საქართველოს იუსტიციის მინისტრი რატი ბერაგაძემ ,,კურიერთან” ექსკლუზიურად ისაუბრა.
მისი თქმით, მიხეილ სააკაშვილი, როდესაც მას ჰქონდა დანიშნული შესაბამისი მკურნალობა, იკვებებოდა შერჩევით და ასევე იღებდა მედიკამენტებს შერჩევით.
-საზოგადოებას კიდევ ერთხელ შევახსენებ, რომ ნათელი იყო თვითდაზიანების რეჟიმი უშუალოდ მიხეილ სააკაშვილის მხრიდან და ამის ყველაზე მარტივი დასტურია თუნდაც ის, რომ ამ ადამიანმა თავდაპირველად შიმშილობა გამოაცხადა, შემდეგ ის გადავიყვანეთ საავადმყოფოში, როდესაც იგი დაბრუნდა კიდევ იყო შიმშილობის ხანმოკლე ეპიზოდი და მე-12 დაწესებულებაში, როდესაც მას ჰქონდა დანიშნული შესაბამისი მკურნალობა, ის იკვებებოდა შერჩევით და ასევე იღებდა მედიკამენტებს შერჩევით.
მინდა დავსვა კითხვა – რა არის ეს ყველაფერი თუ არა თვითდაზიანების მცდელობა?! შემდეგ, როდესაც მას შევთავაზეთ, ისევ მისი ქცევიდან გამომდინარე რისკების გამო, რომ შესაძლებელი იყო, ჯანმრთელობა გართულებოდა და ყველაფერს აკეთებდა იმისათვის, რომ რაიმე ფორმით მოეპოვებინა თავისუფლება, შევთავაზეთ, გადასულიყო კლინიკა “ვივამედში” და ამის სანაცვლოდაც მივიღეთ წინაპირობები, რომელსაც მკურნალობასთან არაფერი ჰქონდა საერთო.
ეს ყველაფერი ვთქვი იმის ხაზგასასმელად, რომ ჩვენ ვაკვირდებით პროცესს, რომელიც მიზნად ისახავს თვითდაზიანებას იმისთვის, რომ ჯანმრთელობის მდგომარეობა უფრო მეტად გართულდეს, რის სანაცვლოდაც უნდა იყოს მოპოვებული თავისუფლება.
სიმულაციებს აქვს ადგილი. ყველაფერს გავაკეთებთ იმისთვის, რომ სახელმწიფო და ქართველი ხალხი იყოს მაქსიმალურად დაცული დეზინფორმაციისგან. გვაქვს ვიდეომასალა, სადაც ჩანს, სააკაშვილი ხელს უშლიდა ექიმების და სასამართლო საქმიანობას. თუკი მაღალი ინტერესიდან გამომდინარე, რასაც ჰქვია სახელმწიფოს უსაფრთხოება, იმიჯი, რომ საქართველოში არავის აწამებენ, იძულებულები გავხდებით, გავასაჯაროოთ გარკვეული კადრები, – აცხადებს რატი ბრეგაძე.
რუსთავი 2