ორი დღეა, უამრავი გამოხმურება აქვს მამა პეტრე კოლხის პოსტსს, სადაც კომუნალურების გაზრდილ გადასახადზე გამოთქვამს პროტესტს. მან ინგა გრიგოლიას გადაცემა ,,რეაქციაშიც” ამ პრობლემაზე კიდევ ერთხელ ისაუბრა და თბილისის მერს, კახი კალაძეს მიმართა, რომ თუ ამ პრობლემას არ გადაწყვეტს, შვილებთან ერთად წყნეთში, სახლში მიადგება.
-მე არავის ვეუბნები, რომ ოჯახი მირჩინოს. მე იმისი პირობები უნდა მქონდეს, რომ ჩემი ოჯახი არ იყოს გაჭირვების ზღვარს მიღმა, კომუნალურებს ვერ იხდიდეს და ზამთარში ბავშვები იყინებოდნენ?დეკემბერში შუქის გადასახადი მომივიდა ორჯერ. ამას გადაყვება ჩვენი ხელისუფლება. მე არ ვაპირებ პოლიტიკური მოწოდებით საუბარს, აქ ვსაუბრობ სოციალური მდგომარეობის გაუმჯობესებაზე.
მის გარეშე შეუძლებელია ღირსეულად ვემსახურო უფალს. მე მაწუხებს არა მხოლოდ ჩემი, არამედ ერის ტკივილი. უნდა ვისაუბროთ ამაზე. არასდროს გავჩუმდები, თუ არავინ გამომყვება, ჩემი 6 შვილით მივადგები კალაძეს წყნეთში და იქ დავუჯდები სანამ ჩემს კომუნალურებს არ გადაიხდის.
სასულიერო პირების 80-90 პროცენტი სიღარიბის მიღმაა. პანდემიის დროს აღარ ტარდება ჯვრისწერები, არც მარხვაში, მათი შემოსავალი კი ჯვრისწერისა და ნათლობების შესაწირია. საპატრიარქოს ფული მაღალ იერარქიებში ნაწილდება, ჩვენამდე არ მოდის. ძალიან ბევრი მღვდელი ღამით გადის და ტაქსაობს, ბევრი დარაჯად მუშაობს, რომ ოჯახი შეინახოს. ზოგს 12 შვილი ჰყავს… ბევრი ამერიკაში წავიდა და იქ მოხუცებს უვლიან, – განაცხადა მამა პეტრემ.