,,დღეს ჩემი დაიკო 19 წლის გახდებოდა” – დაწერა ჯანეტ ქერდიყოშვილმა. მის ცხოვრებაში ეს უდიდესი ტრაგედია მაშინ დატრიალდა, როცა ძალიან ბედნიერი იყო. ის ,,მის საქართველო” გახდა, 3 დღის შემდეგ კი ეს უბედურება დაატყდა თავს.
-დიდი ბედნიერების შემდეგ თავს ტრაგედია დაგვატყდა. ანეტა დედმამიშვილებს შორის ყველაზე პატარა იყო და ძალიან ვანებივრებდით. მისი გარდაცვალების შემდეგ ,,მის მსოფლიოს” კონკურსში მონაწილეობაზე უარი ვთქვი, მაგრამ ბოლოს,ისევ მის გამო გავემგზავრე: გავიხსენე, თუ როგორ იკეთებდა ჩემს ლენტს, რომელზეც ,,მის საქართველო” ეწერა. ამბობდა:,,მე ვარ ანეტა ქერდიყოშვილი, ,,მის საქართველო”. მეკითხებოდა, ინგლისში რომ წახვალ, ტელევიზორში ხომ გნახავო. მთხოვდა, კონკურსზე წასულს ტელეეკრანიდან მისთვის ხელი დამექნია…
დღემდე არ მჯერა, რომ ჩემი დაიკო ჩემ გვერდით აღარაა. მისი გარდაცვალების შემდეგ გავრცელდა ჭორი, რომ ანეტა შეზღუდული შესაძლებლობის მქონე იყო, იმ ბავშვის მარტო დატოვება არ შეიძლებოდაო. ეს აბსურდია. ანეტა ერთ-ერთ ქართულ სკოლაში დადიოდა! ალბათ ჭორი იმიტომ გავრცელდა, რომ ქართულად ლაპარაკი უჭირდა…
იმ დღეს მე და დედაჩემი გავედით საქმეებზე. სახლში დავტოვეთ ჩემი ძმა და ჩემი და, ანეტი. 10 წლის იყო, ძალიან მაღალი იყო, ტანადი, პუტკუნა ხელებით, ლოყებით… ვიღაცებმა დაიწყეს კარზე რეკვა. მას შეეშინდა, ვიღაც რეკავდა, თან მარტო იყო. ეტყობა, ისე გააღო ფანჯარა, ვერ დაიჭირა წონასწორობა, – ყვებოდა ჯანეტ ქერდიყოშვილი თავის დიდ ტკივილზე სხვადასხვა ინტერვიუებში.