,,იმ ე.წ. ქორწილის კლასტერში 42 ადამიანი ვიყავით და ,,ოცნების” სიის წარდგენას რამდენი დაესწრო?” – დიმიტრი ლიპარტელიანი

,,იმ ე.წ. ქორწილის კლასტერში 42 ადამიანი ვიყავით და ,,ოცნების" სიის წარდგენას რამდენი დაესწრო?" - დიმიტრი ლიპარტელიანი,,ერთ-ერთი ქორ­წი­ლმა, რო­მე­ლიც ჩა­ტარ­და თბი­ლის­ში, არ და­ვა­სახ­ლებ, რო­მელ რეს­ტო­რან­ში, ფაქ­ტობ­რი­ვად ხუთი და­მა­ტე­ბი­თი კლას­ტე­რი შეგ­ვიქ­მნა”, – განაცხადა გუშინ პრემიერმა გიორგი გახარიამ. მის ამ ნათქვამს გამოეხმაურა დიმიტრი ლიპარტელიანი, რომელიც ამ ქორწილში სტუმარი გახლდათ.

,,მე ვარ ერთ-ერთი ეპიდკონტაქტი ე.წ. ,,ქორწილის კლასტერიდან”. ამაზე საჯაროდ საუბარს ამ მოვლენების დასრულებამდე არ ვგეგმავდი, მაგრამ რადგანაც პრემიერმა ლამის მთლიანად ამ ქორწილს დააბრალა მეორე ტალღის დაწყება (რაზეც ჩვენს ეპიდემიოლოგებს ჯერ არაფერი უთქვამთ, მაგრამ სავარაუდოდ, გახარიას სიტყვას არ გადათქვამენ), თავს ვალდებულად ვთვლი, გარკვეული სიცხადე შემოვიტანო სიტუაციაში.

...

როცა დაინფიცირების პირველი შემთხვევები დადასტურდა, მარინა ეზუგბაიამ ამ ქორწილის აღწერისას ასეთი ფრაზა თქვა: ,,5 ჯგუფური შემთხვევა გვაქვს ამ 45-ში, ჯგუფური გახლავთ ფართომასშტაბიანი ქორწილიდან თბილისში”

არ გაინტერესებთ ეს ,,ფართომასშტაბიანი ქორწილი” რამდენ ადამიანს გულისხმობს? 42-ს.

42 ადამიანი ვიყავით ქორწილზე და ეს ყოფილა თურმე ,,ფართომასშტაბიანი” ღონისძიება. ქალბატონ მარინას ჰკითხეთ ერთი, ,,ქართული ოცნების” მაჟორიტარული სიის წარდგენას რამდენი ადამიანი დაესწრო და იყო თუ არა ესეც ფართომასშტაბიანი ღონისძიება.

რაც შეეხება უშუალოდ ქორწილს, ყველანი ვიყავით იზოლირებულ კუპეში, რომლის შესასვლელშიც გავიარეთ დეზობარიერი და გაგვიზომეს სიცხე (ამაზე ვხუმრობდი კიდევაც, აქ რომ სიცხე ამოგიგდოს და სუფრასთან ვერ მოხვდე კაცი-თქო). მაგიდები განლაგებული იყო ერთმანეთისგან დიდი დაშორებით და თითოეულ სუფრაზე მხოლოდ 6 ადამიანი ვისხედით.

ტრადიციული ღრეობის მსგავსი – სუფრიდან სუფრაზე სირბილი, განსხვავებულებით ვახტანგურების სმა და უაზრო კოცნა-ლოშნა არ გვქონია. მეტ-ნაკლებად თავშეკავებულად ვიყავით, ზოგადი ეპიდ.სიტუაციიდან გამომდინარე.

ანუ რა გამოდის: ჩავატარეთ ღონისძიება, რომლის ჩატარების უფლებაც კანონიერად გვქონდა მონიჭებული, რომელიც ექცეოდა სახელმწიფოს მიერ გაცემული ეპიდ. რეკომენდაციების ქვეშ და რომელზეც დამსწრე არც ერთ  ადამიანს რაიმე ჩივილი არ აწუხებდა.

სანამ აქ ვიღაცები ბჭობენ, კორონავირუსის ახალი შემთხვევები მოგონილი რიცხვებია თუ არა, მანამდე ჩემი ყოველი დილა სანათესაოში რეკვით და იმის გარკვევით იწყება, ვინმეს ვირუსი ხომ არ დაუდასტურა ტესტირებამ. ამჟამად ლეჩხუმში მცხოვრები ჩემი ნათესავების უმეტესობა ზუგდიდის კლინიკაში COVID-19-ის დიაგნოზით წევს.

სანამ ვიღაცები ამ ამბავზე ღლიცინებთ, მანამდე ჩემი დღე რუტინულად საავადმყოფოში გადაყვანილ ნათესავებთან დარეკვით და მათი ამბების გამოკითხვით გრძელდება.

სანამ იმას განიცდით, რომ ,,გულაობები გაიმაზა”, მანამდე მე ჩემი განმეორებითი ანალიზის პასუხებს ველოდები. ჩემს მაგიდასთან მყოფთაგან 3 უახლოესი ნათესავი ახლა ზუგდიდის კლინიკაში წევს (მათგან ერთი ფილტვების ანთებით), ერთის პასუხს დღეს ველოდებით და 2 გადავურჩით ვირუსს.

ჰოდა, სანამ ვინმე გამოვა და მორალისტურ პედესტალზე დამხობილი დაიწყებს ღაღადს, იქამდე დაფიქრდეს, რამდენად სრულად და ზუსტად იცავს თვითონ რეკომენდაციებს? რამდენად დაუცველია იმისგან, რომ სრულიად მოულოდნელად დაურეკონ და უთხრან, რომ ეპიდკონტაქტია?”, – წერს ლიპარტელიანი.