,,რუსთავი 2″-ზე სიუჟეტი გავიდა ნიკორწმინდელი მიტროპოლიტის, ვახტანგ ლიპარტელიანის შესახებ. მათუ ინფორმაციით, სასულიერო პირი წილებს ფლობს კომპანია ,,ევრომოტორსში,” რომელიც ავტომობილებითა და სათადარიგო ნაწილებით ვაჭრობს. კომპანია ,,ბარაკონში” კი 55 პროცენტის მფლობელია.
საჯარო რეესტრის თანახმად, კომპანიას შეუძლია ნებისმიერი საქმიანობა აწარმოოს. გარდა ამისა, სასულიერო პირი ხელმძღვანელობს სასოფლო-სამეურნეო კოოპერატივ ,,ჭელიშს.” ამ ორგანიზაციის საქმიანობა მეფუტკრეობასთან, მევენახეობასა და მეფრინველეობასთანაა დაკავშირებული.
ამ სიუჟეტს გამოეხმაურა მამუკა გამყრელიძე, რომელიც წერს, რომ მიტროპოლიტი მისი მეგობარია და ტელეკომპანიაში არასწორი ინფორმაცია გავიდა.
,,არ შემიძლია არ გამოვეხმაურო ,,რუსთავი 2″-ის დღევანდელ რეპორტაჟს მეუფე ვახტანგ ლიპარტელიანის ქონებაზე.
ჩემო კარგო რუსთაველებო, ხანდახან ასე სიტყვაზე არ უნდა ენდოთ ინფორმაციას. უნდა გადაამოწმოთ ხოლმე.
2001 წლიდან რომ არ მუშაობს კომპანია, იმის მეწილეობის გასაჯაროება დიდი სკანდალია? ან მეფუტკრეობას ეწევა და დიდი ბიზნესი აქვსო, ამას რომ ამბობდა ის ახალგაზრდა ქალბატონი არასამთავრობოდან. მე მკითხეთ და ზუსტად მოგიყვებით.
გიორგი ლიპარტელიანი ბიზნესმენი იყო ძალიან დიდი ხნის წინ. ჩემს ერთობლივ საწარმოში დაიწყო მოღვაწეობა ჯერ კიდევ სსრკ-ს დროს. მერე ერთად წავედით რუსეთში. მერე იყო უკრაინა. კვლავ რუსეთი და ჩემი ახალგაზრდა და უსაყვარლესი მეგობარი უცბად, კარდინალურად შეიცვალა. დაბრუნდა საქართველოში. გახდა მორჩილი. ბერად აღიკვეცა და რუსეთში უკვე მღვდლად დაბრუნდა.
რამდენი სიკეთე აკეთა მოსკოვის ქართულ ეკლესიაში იქნებ გაგეკითხათ. ახლაც, თავისი ხელით შრომობს ყოველდღე მეურნეობაში. ფუტკრები მოაშენა ნელ-ნელა. სწრაფად არ გამოსდის, დათვები იცის რაჭაში და უჭამენ ხოლმე. ერთი განახათ, რა მეურნეობა გააკეთა. სულ ფერად-ფერადი პომიდვრები და კარტოფილი აქვს. ღვინოსაც თვითონ წურავს და პორტვეინის კეთებაც დაიწყო. ცოტ-ცოტა, ისე, რომ ახლობლებისთვის ეყოს.
რაის ქონება, ხალხო ? ცოლი მას არ ჰყავს და არ ჰყოლია. დედამისიც მონაზონია და ერთი ძმა ჰყავს, რომელიც მეურნეობაში ეხმარება ხოლმე. ძველისძველი ,,ტოიოტას” ჯიპით დადის. ორხიდიანით. რაჭის სოფლებში სხვა მანქანით ვერ ახვალ. ქონება არა, კვატა. დედ-მამის დატოვებული პატარა ბინა ვერაზე თუ ითვლება ქონებად, მაშინ კი.
იშვიათი წესიერების და პატიოსნების ადამიანია და რაღა ასეთ რარიტეტულ გამონაკლისს დაესხით თავს ?
,,პორტელ” (აწ უკვე მეუფეო ), ჩემი დაცვა არ გჭირდება. უბრალოდ ჩვენი მეგობრობა, სიყვარული, კარგი და ცუდი დღეები გამახსენდა და იმიტომ ვწერ. მიყვარხარ და პატივს გცემ, ძმაო!” – დაწერა მამუკა გამყრელიძემ.