,,ტაბულას” ხელმძღვანელი თამარ ჩერგოლეიშვილი ნაციონალური მოძრაობის შესახებ წერს და იმ მიზეზებზე, რამაც პარტია ორად გაყო.
,,აი, აქ კომენტარებში შეიხედეთ და ეგრევე მიხვდებით:
1. რატომ დაიშალა ენმ;
2. რატომ ღმუის საპროტესტო აქცია ენმ-ის წევრთა მიმართვებზე და სააკაშვილის ხსენებაზე;
3. რატომ უნდა იყო ყოველთვის და ყველგან შორს ნაცი ველურებისგან;
4. რატომ მივიჩნევ დოყლაპია იდიოტად ყველას, ვისაც ნაცებთან რამეზე შეთანხმების იმედი აქვს,
შეიხედეთ კომენტარებში და მიხვდებით” – წერს ჩერგოლეიშვილი და ქმრის, ,,ევროპული საქართველოს ერთ-ერთი ლიდერის, გიგა ბოკერიას განცხადებას აქვეყნებს.
,,მსურს, გამოვეხმაურო ოთო კახიძის მოსაზრებებს 20 ივნისის ღამის შესახებ, რომელიც სოფო ვერძეულის დასკვნის გამოქვეყნებას მოჰყვა.
ვთვლი, რომ ოთო კახიძემ ზუსტად დასვა ყველა აქცენტი.
1. კრიზისის განსამუხტად იმ დღესვე უნდა გადამდგარიყო პარლამენტის თავმჯდომარე.
2. პარლამენტში შეჭრის აღსაკვეთად, სპეცრაზმის მომიტინგეების პირისპირ, პარლამენტს გარეთ დაყენება გაუგებარი და გაუმართლებელია. სპეცრაზმი უნდა მდგარიყო ალაყაფს შიგნით და დაეკავებინათ ყველა, ვინც შეჭრას შეეცდებოდა.
3. რა თქმა უნდა, მომიტინგეები უნდა გაეფრთხილებინათ მკაფიოდ და გარკვევით ადგილზე, თუ ძალადობრივად შლიდნენ აქციას.
4. პრინციპულად არასწორია ქალბატონი ვერძეულის შეფასება, რომ რამდენიმე ათეული პირის ძალადობრივი ქმედება, ათიათას კაციან მიტინგს აქცევდა ძალადობრივად.
5. ის, რომ გამოყენებული ძალა დანაშაულებრივად დისპროპორციული იყო, ამაზე სრული კონსენსუსია.
რაც შეეხება ბატონ მელიას,
მიმაჩნია, რომ მელიას მიმართ წაყენებული ბრალდებები სამართლებრივად არის სრული აბსურდი, პოლიტიკურად კი უტიფარი მცდელობა მოიხსნან პასუხისმგებლობა, რაც მთლიანად ივანიშვილის ხელისუფლებას და პირველ, რიგში გახარიას ეკისრება.
მაგრამ ამავდროულად, მთლიანად ვიზიარებ ოთოს პოზიციას, რომ მელიას განცხადება პოლიტიკურად უპასუხისმგებლო იყო. ამ ტიპის განცხადებები, სხვა ყველაფერს რომ თავი გავანებოთ, სულ მცირე ივანიშვილის უადვილებს პროპაგანდას.
ჩემი აზრით, ნაციონალური მოძრაობა ამ სამართლიან კრიტიკას უნდა შეეგუოს. ან არ შეეგუოს და აწარმოოს ამაზე დისკუსია.
ჩვენი საზოგადოების მთავარი სამიზნე არის ივანიშვილის ხელისუფლება, მინისტრი გახარია უნდა გადადგეს. ივანიშვილის ხელისუფლება მთლიანად, კი უნდა დავამარცხოთ შემდეგ პროპორციულ არჩევნებში”.