მომღერალ ნინი ქარსელაძეს რამდენიმე დღის სინ მამა გარდაეცვალა. მას და თეკუჩა ქარსელაძეს განსაკუთრებული მამაშვილობა ჰქონდათ. მიუხედავად იმისა, რომ ნინის მშობლები გაშორებულები იყვნენ, მათ ერთმანეთთან საუკეთესო ურთიერთობა შეინარჩუნეს.
,,აი, ასე… გამომეცალა ყველაზე დიდი ძალა… ჩემი ,,აპორა”.
წარმოდგენა არ მაქვს, უშენოდ რა უნდა ვქნა. ჩემო სიცოცხლე და სიყვარულო.
თურმე რამდენი რამ არ მცოდნია შენს შესახებ და ამ 4 დღეში იმდენი გავიგე, მოვისმინე…
დარწმუნებული ვარ იმ გზასაც, რომელიც ახლა გაქვს გასავლელი, ისე ვაჟკაცურად გაივლი, როგორც აქ გაირე და დატოვე უსაზღვრო სიყვარული.
წარმოდგენა არ მაქვს, როგორ უნდა ვიცხოვრო შენ გარეშე. არც ის ვიცი, რა დავწერო… შენნაირები ნამდვილად აღარ იბადებიან…
მადლობა სიყვარულისთვის და ყველაზე დიდი მადლობა იმისთვის, რომ ასე ამაყად მატარე 28 წელი… მა, დარწმუნებული ვარ, ოდესმე შევხვდებით და მოგიყვები უშენოდ გატარებულ ყველა წამს და წუთს…
მაპატიე, რომ შენი ყველაზე დიდი სურვილის ასრულება ვერ მოვასწარი”, – ასე გამოემშვიდობა ნინი თავის საყვარელ ადამიანს.
მომღერალი თავის ოჯახურ ურთიერთობებზე ყოველთვის გულახდილად საუბრობს ხოლმე.
-ზურამ და ხათუნამ რომ იქორწინეს, მამა მაშინ ციხეში იჯდა, იქიდან დაურეკა დედას და ასეთი რამ უთხრა: დემი მური რომ თხოვდებოდა, ყოფილმა ქმარმა, ბრუს უილისმა დაურეკა და უთხრა, თუ გინდა, მეჯვარედ წამოგყვებიო და შენც თუ გინდა, მეჯვარედ წამოგყვებიო.
ხათუნამ კი, კაი რა, თეკუჩა, ნუ ბოდავ რაღაცებსო და ტელეფონი გაუთიშა. მამაჩემი ზურას სიძეს ეძახის.
საოცარი ისტორია გვაქვს ოჯახში. ბებიაჩემი, მამაჩემის დედაც მოდის ჩვენთან სტუმრად და ამაში არაფერი პრობლემა არ არის. პირიქით, ყველა თბილად და ტკბილად იღებს.
მამაჩემი ძალიან ,,ლაითი” ადამიანია. ყველაფერზე დამყოლია. ხათუნამ ბევრი ხვეწნა-მუდარის მიუხედავად, ზურა ვერ დაიყოლია, რომ ანასტასიას (ნინის და) პასპორტით ორი გვარი ჰქონოდა, ხაჩიძე-ჟორდანია. მამაჩემი კი დაიყოლია და მე ქარსელაძე-ჟორდანია ვარ.
ძალიან მეგობრული ურთიერთობა მაქვს მამასთან. საერთოდ, რაც წლები გადის, უფრო ვხვდები დედის და მამის ფასს. ბავშვობაში ასე ვერ ვაცნობიერებდი.
შეიძლება ხმამაღალი ნათქვამია, მაგრამ ვამაყობ, რომ ხათუნა ჟორდანიას და თეკუჩა ქარსელაძის შვილი ვარ. სადაც უნდა ვიყო, წინ მხვდება, ეს თეკუჩას შვილია, ხათუნას შვილიაო, – ყვებოდა ნინი ქარსელაძე.