უკრაინაში, დონბასში რუსეთის აგრესიას, რუსეთის ფედერაციის შეიარაღებული ფორმირებების თავდასხმას ქართველი ლეგიონერის, დავით შარტავას, სიცოცხლე შეეწირა.
,,მე-11 თელავის ბატალიონიდან დავით შარტავას რუსმა აგრესორებმა ავტომატური ყუმბარმტყორცნის АГС-17 ის 30-მმ ყუმბარები ჩაუყარეს სანგარში. დავით შარტავა დაიღუპა, ერთი უკრაინელი ჯარისკაცი დაიჭრა”, – წერია ფეისბუქგვერდზე ,,ვემსახურები საქართველოს”.
უკრაინული მედიის ცნობით, ოპერატიულ-ტაქტიკურ ჯგუფ ,,აღმოსავლეთის“ პასუხისმგებლობის არეალში რუსეთის ფედერაციის შეიარაღებულმა ფორმირებებმა კიდევ ერთხელ დაარღვიეს ცეცხლის შეწყვეტის რეჟიმი და უკრაინელი ჯარისკაცების პოზიციებს ყუმბარმტყორცნებიდან ცეცხლი გაუხსნეს.
-მტრის მიერ ცეცხლის გახსნის შედეგად 128-ე ცალკეული სამთო თავდასხმის ბრიგადის მებრძოლი, უფროსი ჯარისკაცი, დავით შარტავა, დაიღუპა, – წერს უკრაინული მედია.
,,ბრძოლაში დაეცა ჩვენი უსაყვარლესი მეგობარი და მებრძოლი, დათო შარტავა. ბოლო რამდენიმე თვე მივლენილი იყო ერთ-ერთ ბრიგადაში. დათო ჯარისკაცის გარდა ჩემი მეგობარი იყო. ვუსამძიმრებ ოჯახს და მეგობრებს”, – წერს სოციალურ ქსელში ქართველი ლეგიონის ხელმძღვანელი, მამუკა მამულაშვილი.
დავით შარტავა ქართული ლეგიონის რიგებში 2016 წლიდან ირიცხებოდა. 44 წლის მებრძოლს მეუღლე და ორი შვილი დარჩა. მამუკა მამულაშვილის თქმით, ქართული მხარის თანხმობის შემთხვევაში მის ცხედარს სამშობლოში ჩამოასვენებენ.
-დავითი მივლინებული იყო ერთ-ერთ უკრაინულ ბრიგადაში. მოხდა შეტაკება და შეტაკების დროს არის გარდაცვლილი. ქართული ლეგიონის წევრებში იმყოფებოდა 2016 წლიდან. მთელი ომი, 2016 წლიდან ფაქტობრივად ერთად გამოვიარეთ. ოჯახი საქართველოში ჰყავს და თუკი საქართველოს საელჩომ ხელი შეგვიწყო, მოხდება დავითის გადმოსვენება საქართველოში, – განაცხადა ,,ქართული ლეგიონის” მეთაურმა ,,კურიერთან” სატელეფონო საუბრისას.
,,დიდება სამშობლოსთვის თავგანწირულებს!”, ,,დიდება გმირს!”, ,,ძალიან გულდასაწყვეტია,
გმირები არ კვდებიან!”, ,,ნათელში იყავი, ჩემო ძმაო, ჩემო მგელო”, ,,კიდევ ერთი ძმა დავკარგეთ, ჩვენი შარო”, – წერენ სოციალურ ქსელში.
,,სარკე” უსამძიმრებს დავით შარტავას ოჯახს, მის დედას, ,,სარკის” თანამშრომელს, მარინა ჟღენტს. გმირები არ კვდებიან!