,,ქალაქ ხაშურის N1 საჯარო სკოლა სრულ მზადყოფნაშია 2020-2021 სასწავლო წლის დასაწყებად” – დაიწერა სკოლის ფეისბუქგვერდზე და ფოტოებიც გამოქვენდა. ერთ-ერთმა ფოტომ, სადაც ჩანს, რომ სკოლამ ერთი საკლასო ოთახი გარეთ გამოიტანა, დიდი აჟიოტაჟი გამოიწვია. მთელი დღის განმავლობაში აზიარებდნენ სოციალურ ქსელებში და ქილიკობდნენ.
სინამდვილეში სკოლა მართლაც სრულ მზადყოფნაშია სწავლის დასაწყებად და პანდემიის გამო დაწესებული რეგულაციებიც სრულად არის გათვალისწინებული (ფოტოები იხილეთ ქვემოთ).
ცნობისათვის ამ სკოლას კულტურული მემკვიდრეობის სტატუსი აქვს:
,,ამ სკოლის შენობა 1916 წელს აშენდა, როცა თბილისის უნივერსიტეტიც კი არ არსებობდა და დღეს საქართველოს კულტურული მემკვიდრეობის ძეგლის სტატუსს ატარებს.
აქ ასწავლიდნენ ისეთი ადამიანები, როგორებიც იყვნენ: ნიკიფორე იმნაიშვილი – პედაგოგი, პოლიტიკოსი, საქართველოს პირველი რესპუბლიკის დამფუძნებელი კრების წევრი; პეტრე ჭაბუკიანი – მხარეთმცოდნე, პედაგოგი, ისტორიული და ბუნების ძეგლების დამცველი, კარსტულ მღვიმეთა მკვლევარი. მის სახელს უკავშირდება საქართველოში, სათაფლიის სახელმწიფო ნაკრძალის მღვიმეების აღმოჩენა, მათი შესწავლა და შემდგომი პოპულარიზაცია.
ამ სკოლაში სწავლობდნენ: კალისტრატე სალია, გრიგოლ კიკნაძე, ალექსანდრე ბარამიძე, გრიგოლ ბუხნიკაშვილი, გრიგოლ ბარამიძე, შალვა ხერხეულიძე, გიორგი ლობჟანიძე და ა.შ. საკლასო ოთახები ნამდვილად არ უჭირთ”, – წერს სოციალურ ქსელში გიორგი შუთიძე.
