,,მთელი ოჯახი ბავშვზეა გადართული, ბიძინა ივანიშვილს ერთი სული აქვს პოლიტიკაში აღარ იყოს” – ეკა ჭიჭინაძე

,,მთელი ოჯახი ბავშვზეა გადართული, ბიძინა ივანიშვილს ერთი სული აქვს პოლიტიკაში აღარ იყოს" - ეკა ჭიჭინაძემხატვარი ნიკუშა შენგელაია და მისი მეუღლე ეკა ჭიჭინაძე ბიძინა ივანიშვილის ოჯახთან დაახლოებული პირები არიან. ეკა ჭიჭინაძე თავის მეგობარ, ბიძინა ივანიშვილის მეუღლეზე ეკატერინე ხვედელიძეზე ,,კვირის პალიტრასთან” საუბრობს:

– გავრცელებულ ხმებზე, თითქოს ეკატერინე ხვედელიძე საპარლამენტო სიის პირველი ნომერი იქნება, გულწრფელად გითხრათ, ძალიან  მეცინება… ეკატერინე ხვედელიძე იქნება პირველი ნომერი, მე – მეორე და ასე შემდეგ… ისე, იმათ კი ვაჯობებთ, ახლა რომ თავგანწირულად იბრძვიან ხელისუფლებაში დასაბრუნებლად…
რა საპარლამენტო სიის პირველი ნომერი, რა სისულელეა?! – ივანიშვილები ბავშვს ელოდებიან და ახლა მხოლოდ მაგაზეა მთელი ოჯახის ყურადღება გადატანილი. მეც ვერიდები მათ ზედმეტად შეწუხებას. ეკას კი არა, პოლიტიკაში ყოფნა, მგონი,
ბიძინასაც არ უნდა, მაგრამ სხვა გზა არ აქვს! ვერ ტოვებს, თორემ ერთი სული აქვს, მანდ აღარ იყოს.

ეკას პოლიტიკაში მოსვლაზე ხომ საერთოდ ზედმეტია საუბარი!

– მშენებარე უნივერსიტეტზე გადაღებულ ვიდეოში მისმა გამოჩენამ ეჭვები გააჩინა…
– ძალიან კარგი, რომ გამოჩნდა! რაც ვიცნობ, ცოლ-ქმარს სულ მაგ თემაზე აქვთ სასაუბრო. მთელი სულით და გულით უნდოდათ საქართველოში საუკეთესო უნივერსიტეტის აშენება. ხან ტერიტორია არ მისცეს, ხან რა შეფერხება ჰქონდათ. თავიდან უნდოდათ კრწანისის ქუჩაზე, მერე დიღომში, მაგრამ საბოლოოდ ქუთაისში მოხერხდა და ძალიანაც კარგი!

ეკასთვის უმნიშვნელოვანესია განათლების სფერო… მათი ოცნება იყო ეს უნივერსიტეტი! მათ შვილებს რომ მოუხდათ საზღვარგარეთ წასვლა – ერთს – ამერიკაში, მეორეს – საფრანგეთში, მათთვის რთული აღმოჩნდა. შეკრული ოჯახია და ადვილი არ არის შვილების შორს ყოფნა. თავისთან უნდათ ჰყავდეთ და მეც ერთი სული მაქვს, მალე აშენდეს, ჩემი შვილი ამერიკაში კი არა, აქ უნდა სწავლობდეს.
ისე კი, რაც ახლა ჩვენ ირგვლივ ხდება, სულ გაუნათლებლობიდან მოდის. ვერ გაურჩევიათ შავი და თეთრი, ერთი აგური არ დაუდიათ სასიკეთოდ ხელისუფლებაში ყოფნისას და ახლა ისევ ყვირიან და კივიან მოსაბრუნებლად.

– ისევ ეკა ხვედელიძის შესახებ რომ გვესაუბროთ, როგორი დედამთილია, როგორი დამოკიდებულება აქვს რძალთან?
– ეკასაც და ბიძინასაც რძალი ძალიან მოსწონთ და გადასარევი ურთიერთობაც აქვთ. საერთოდ ივანიშვილებისთვის ოჯახი უმთავრესია! თან ჰყვებიან ბერას მეუღლეს, ხომ წარმოგიდგენიათ როგორ პირობებში ეყოლებათ, ღმერთო ჩემო… ნანუკაც ძალიან ლამაზი და ჭკვიანი გოგოა! ბერა და ნანუკა ძირითადად საქართველოში ცხოვრობენ, ახლაც აქ არიან.

რომ იძახიან ბიძინამ იყიდა ზღვა, მთა, ცაო, არ შემიძლია, რომ არ ვთქვა ბიძინას მოთმინებაზე! ზოგჯერ მიფიქრია, მართლა რომ დაიხუროს ქუდი და წავიდეს და ესენი მოვიდნენ, რა გვეშველება… ერთი ინვესტორი გვყავს და რა დღეში აგდებენ და მერე რა იქნება, არც მინდა, ვიფიქრო. ერთმანეთსაც კი გადაეკიდებიან. ბოლომდე გამოაჩინეს თავიანთი სახე, რაც ხელისუფლებაში ყოფნისას აგრესიულები იყვნენ, ახლა კიდევ უარესები არიან! არც ხელისუფლებაში ვარგოდნენ და არც – ოპოზიციაში! ნული პროცენტია მათი მობრუნების შანსი, ვიდრე  ჩვენი თაობა ცოცხალია…  ბიძინა რომც წავიდეს, მათი მობრუნება წარმოუდგენელია!

– ბიძინა ივანიშვილი პირადად ნახეთ იმის შემდეგ, რაც პროპორციული არჩევნების თაობაზე ცვლილებები პარლამენტში ჩავარდა?
– პირადად არ შევხვედრივარ, მაგრამ გვქონდა გარკვეული სახის კომუნიკაცია, თუმცა ამ საკითხზე არ გვისაუბრია, ისედაც დარწმუნებული ვარ, როგორც ამბობს, ისე იყო.

კვირის პალიტრა, ავტორი მანანა გაბრიჭიძე

,,მთელი ოჯახი ბავშვზეა გადართული, ბიძინა ივანიშვილს ერთი სული აქვს პოლიტიკაში აღარ იყოს" - ეკა ჭიჭინაძე

დატოვეთ თქვენი კომენტარი