სპორტსმენსა და მსახიობს, დავით ქაცარავას, რეჟისორებმა თუ ჟურნალისტებმა სექსუალური მამაკაცის იმიჯი მოარგეს. ბევრი თაყვანისმცემელი ქალიც ჰყავს, მაგრამ ეს მისი და მისი ცოლის, სოფო ხაჭაპურიძის ურთიერთობაზე უარყოფითად არ აისახება.
– დავით, თქვენ და სოფო ხაჭაპურიძეს სამი შვილი გყავთ. თქვენს თანაცხოვრებაში არ არის სკანდალები, სტაბილური წყვილი ხართ. როგორ ახერხებთ ამას?
– მარტივი რეცეპტი გვაქვს, მე და სოფოს ერთმანეთი გვიყვარს. ამას გარდა, ჩვენ დროულად ავითვისეთ კომპრომისების ხელოვნება. 12 წელია, რაც ცოლ-ქმარი ვართ, შეყვარებულები კი – 19 წელია.
ბუნებრივია, რთული ეტაპები თანაცხოვრების პერიოდში პერმანენტულად ჩნდება ხოლმე, მაგრამ ადამიანი თუ გიყვარს, მზად ხარ, მის გამო ბევრ რამეზე დახუჭო თვალი. გამონათქვამია ასეთი – ოჯახური ცხოვრება კომპრომისების ხელოვნება არისო. თუ ის ადამიანი შენთვის ღირებულია, ძალიან მარტივია ურთიერთობის შენარჩუნება.
– ქალების მხრიდან ყურადღების ცენტრში ხშირად ექცევით. ეს თქვენს ურთიერთობას არ უშლის ხელს?
– არა. ორივე ვგრძნობთ ქალების მხრიდან გარკვეულ ყურადღებას, ეს ეჭვიანობის ფაქტორიც გამხდარა, მაგრამ მთავარი ის არის, რომ ეჭვიანობის საფუძველი არ არსებობს.
– 40 წლის ხართ. როგორი ასაკია ეს მამაკაცისთვის?
– სიმართლე გითხრათ, ასაკს ვერანაირად ვგრძნობ. ერთი რამ ზუსტად ვიცი: ადამიანი დაბერებას მაშინ იწყებს, როცა გადაწყვეტს, რომ დაბერდა. ფიზიკურად ახლა უკეთესად ვგრძნობ თავს, ვიდრე თუნდაც 20 წლის ასაკში. ენერგია ულევად მაქვს.
ეკა ლემონჯავა, ჟურნალი “სარკე”