ტელეკომპანია ,,იმედის” წამყვანი, თორნიკე კერენჩხილაძე, პროექტში ,,ცეკვავენ ვარსკვლავები” მონაწილეობს. ცნობილი გახდა, რომ მისი მეწყვილე ანი ჯავახი იქნება.
თორნიკე კვერენჩხილაძე ჯანსაღი ცხოვრების წესს მისდევს. ხშირად ველოსიპედით დადის. როცა ახალ გადაცემას ,,იმედის დღეს” იწყებდნენ, ვიდეორგოლის გადაღებას კინაღამ შეეწირა. ის ,,სარკეს” უყვებოდა:
– საიმიჯო ვიდეორგოლს ვიღებდით გადაცემისთვის. გადავწყვიტე, ველოსიპედით 
დავშვებულიყავი, რაც არაერთხელ გამიკეთებია. კუს ტბიდან ვაკის პარკში უნდა ჩავსულიყავი, სიჩქარე ძალიან მქონდა აკრეფილი, ველოსიპედი ვერ დავიმორჩილე და ძირს პირდაპირ სახით დავასკდი.
რამდენიმე წამი გათიშული ვეგდე. ჩემი მეგობრები, ჟურნალისტი და ოპერატორი, დამეხმარნენ, გონზე მომიყვანეს. შემდეგ ექიმმა “დასტროჩკა” ჩემი სახე. გამიმართლა, რომ გარედან ბევრი ნაკერი არ მქონდა, ძირითადად შიგნიდან დამადეს. ტუჩის ზედა ნაწილი, ცხვირის ქვემოთ გაკერილი მაქვს, ასევე – შიგნით თითქმის მთელი ყბა. 25 ნაკერამდე მედო შიგნიდან.
გადაცემის თანაწამყვანს, ნიკა წულუკიძეს გავეხუმრე, შენს პერანგს არ აქვს იმდენი ნაკერი, რამდენიც მე მაქვს სახეზე-მეთქი.
– გაგიმართლათ, რომ იარები არ გეტყობათ.
– სარკეში პირველად რომ ჩავიხედე, მეგონა, ყველაფერი დამთავრდებოდა. ტუჩები დასიებული მქონდა, ოღონდ გასიებასაც გააჩნია, საშინელი შესახედავი ვიყავი. ძალიან კარგი ექიმების დახმარებით მოვახერხე ის, რომ ახლა ასეთი ვარ.
იმიჯის შეცვლა და ეთერში წვერით დაჯდომა მომიწია, რაც ჩემთვის ახალია. წონაშიც 
დავიკელი, რადგან საკვებს ვერ ვიღებდი, პირის მთელი აპარატი გაჩერებული მქონდა, ათი დღის განმავლობაში საწრუპით ვსვამდი იოგურტებს. მეგობრები მეხუმრებიან, დაცემა მოგიხდაო.
– რამდენი დაიკელით?
– 7 კილო. ზოგი ჭირი მარგებელია, დაცემას მოჰყვა ფეხზე ადგომა და წონაში დაკლებაც. ახლა ვცდილობ, ეს წონა შევინარჩუნო, აქტიურად ვვარჯიშობ, ფეხბურთს ვთამაშობ, ველოსიპედითაც დავდივარ. მოკლედ, როგორც ვცხოვრობდი დაცემამდე, იმაზე აქტიური ვარ ახლა.
– წვერს დაიტოვებთ?
– იმდენად შევეჩვიე, დიდი ალბათობით ასეთი იმიჯით ვიქნები. სრულ რეაბილიტაციას დაველოდები და ამის შემდეგ გადავწყვეტ, დავიტოვო თუ არა.
– რეაბილიტაციისთვის რამდენი დრო დაგჭირდათ?
– სხვათა შორის, ძალიან მალე მოვახერხე ფორმაში ჩადგომა, რადგან შეხორცების პროცესი 
კარგად წავიდა. ეს ამბავი 12 აპრილს შემემთხვა და 1 მაისს უკვე ეთერში ვიჯექი.
– მოკლედ, “იმედის დღის” პრომოს კინაღამ შეეწირეთ.
– კი და ეს ჩემი დაუდევრობის ბრალი იყო, რადგან არ შეიძლებოდა ისე დავშვებულიყავი. ჩემი სიცოცხლე ჩაფხუტმა იხსნა. ის რომ არა, ახლა ვერ ვისაუბრებდით.
– ვიცი, რომ ველოსიპედით სიარული გიყვართ. თქვენს კოლეგა ვახო სანაიასთან ერთადაც ხშირად დადიხართ. სხვა დროს თუ შეგმთხვევიათ ხიფათი?
– ველოსიპედით აქტიურად დავდივარ, თუმცა ახლა ძირითადად სამსახური-სახლის მიმართულებით დავდივარ, სტუდენტებთანაც ველოსიპედით მივდივარ. თბილისი ველომოყვარულებისთვის ადაპტირებული არ არის, ვიცი, რომ ველობილიკების გაკეთება დაგეგმილია და ეს ძალიან მახარებს.
ვთქვი, რომ ველოს თავს დავანებებდი, მაგრამ ვერ შევეშვი, იმდენად მაგარი შეგრძნებაა, იმდენად კომფორტულია ამით გადაადგილება, თავს ვერ ვანებებ.
– რამდენ ხანში შეძელით ველოსიპედზე ისევ დაჯდომა?
– დაახლობით 18 დღეში. რომ მახსენდება, ჩაფხუტის გარეშე რას ვაკეთებდი და როგორ დავდიოდი, მეშინია და ვცდილობ, ფრთხილად ვიარო. თუ ვინმეს აქვს გადაწყვეტილი ექსტრიმი გამოსცადოს, ჩაფხუტი აუცილებლად გამოიყენოს, წინააღმდეგ შემთხვევაში შეიძლება რაღაცები ძალიან ცუდად დასრულდეს.
სარკე (თორნიკე კვერენჩხილაძის და ანა ჯავახის ფოტოები)