ბოლო დღეებში მომღერალ ნინი ქარსელაძეზე ვრცელდება ინფორმაცია, რომ სოფო ხალვაშის მსგავსად თანამდებობაზე ინიშნება, რასაც ნინი ქარსელაძე კატეგორიულად უარყოფს. ის ამ თემაზე ამბები.ჯი-სთან საუბრობს:
– ცხოვრებაში არ მიფიქრია პოლიტიკაში ყოფნაზე. დიდი ადრენალინი ჰქონია ამ პროცესებში ჩართვას, მაგრამ არ ვაპირებ პოლიტიკაში წასვლას. ანასტასიას გეფიცებით, არანაირი დაპირება არ მიმიღია “ქართული ოცნებისგან”, სამსახურიც არ მჭირდება. მე უკან მყავს ოჯახი, რომელიც საქართველოში არ მოღვაწეობს. ჩემთვის თანხაც კი არავის გადაუხდია.
მხოლოდ ჩემი კეთილი ნება იყო, ქალბატონი სალომეს მხარდასაჭერ კონცერტებში მიმეღო მონაწილეობა. მე მივფრინავ საქართველოდან, საქმეები მაქვს როგორც ევროპაში, ასევე რუსეთში. აქამდე მხოლოდ იმიტომ დავრჩი, რომ იმ ადამიანების მობრუნების საფრთხე დავინახე, ვინც 9 წელი იყო ქვეყნის სათავეში. მხოლოდ იმიტომ გადავდე უცხოეთში საქმეები, რომ წინასაარჩევნო ამბავი ბოლომდე მიგვეყვანა და ქალბატონ სალომე ზურაბიშვილს გაემარჯვა.
– გავრცელდა ინფორმაცია, რომ პროკურატურას მიმართეთ და იმ ხალხს უჩივლეთ, ვინც სოციალურ ქსელში გემუქრებოდათ, მართალია?
– ნამდვილად შევიტანე სარჩელი პროკურატურაში, იმედი მაქვს, ჩვენი ახალი პროკურორი შალვა თადუმაძე და მისი სტრუქტურა მალე გამოიძიებს საქმეს და პასუხი მოეთხოვება ყველა იმ ადამიანს, ვინც საშინელებებს მწერდა და მემუქრებოდა. რამდენიმე ცნობილ ადამიანსაც დაიბარებენ პროკურატურაში, პასუხს მოსთხოვენ სამართლებრივ ჭრილში.
– დათო იმედაშვილს და მაია დარსმელიძესაც უჩივლეთ?
– დათო იმედაშვილი ვინ არის, საერთოდ არ ვიცი. ერთხელ ჩამიგდეს მისი სტატუსი და მაშინ გავიგე მისი არსებობა. რაც შეეხება მაია დარსმელიძეს… მე სტეფანესთან ვგრძნობ თავს შერცხვენილად და დამნაშავედ, რადგან გადავედი იმ მოედანზე, სადაც არასდროს გადავსულვარ 28 წლის მანძილზე, პრინციპები დავარღვიე, მაგრამ მაია დარსმელიძემ შეურაცხყოფა მიაყენა „ქუჩის ბიჭებს“. ჩემზე შეიძლება გავატარო ნებისმიერი ტალახის სროლა, მაგრამ არსებობენ ადამიანები, ვის გამოც პრინციპებსაც ვარღვევ. კონკრეტულად, რომელ ცნობილ ადამიანებს დაიბარებს პროკურატურა, ჯერჯერობით ამის თქმის უფლება არ მაქვს.
– გავრცელდა ინფორმაცია, რომ პირადი დაცვა აიყვანეთ…
– ეს არის მხოლოდ ხუმრობა.
ამბები.ჯი.