ბათუმი-თბილისის რიგით მე-12 საერთაშორისო ფესტივალის ,,ღამის სერენადების” მონაწილეებმა, თათა ლიჩელმა (ფორტეპიანო) და გია ყანჩელის სახელობის კვარტეტმა თემურ ჯაიანის (პირველი ვიოლინო), ნიკა ბარათელის (მეორე ვიოლინო), მამუკა ბაბუაძის (ალტი) და გიორგი იმანოვის (ჩელო) შემადგენლობით რეპეტიცია გამართეს.
თათა ლიჩელი, პიანისტი:
– ,,ღამის სერენადები” ის გამორჩეული ფესტივალია, რომელსაც ძალიან მნიშვნელოვანი ადგილი უკავია საქართველოს მუსიკალურ ცხოვრებაში, იმიტომ, რომ ამდენი ხნის არსებობის მანძილზე ყველა კონცერტი არის ისეთი, რომელიც მსმენელს და მაყურებელს ახსოვს დიდი ხნის მანძილზე.
ჩემთვის ეს ფესტივალი გამორჩეულია იმით, რომ ქალბატონ ლიანასთან ერთად ძალიან ბევრი წლის წინ დავიწყეთ თანამშრომლობა და იმის შემდეგ ძალიან დიდი პატივი, ბედნიერება, სიხარული მქონდა იმისა, რომ შევხვედროდით სცენაზე მე და ქალბატონი ლიანა და ის არაჩვეულებრივი მუსიკოსები, რომლებიც ჩამოჰყავდა ფესტივალის მანძილზე.
წლევანდელი ფესტივალი გამორჩეულია იმით, რომ სულ სხვა ფორმატში ტარდება არსებული მდგომარეობიდან გამომდინარე. ძალიან საინტერესო ფორმატია, მიუხედავად იმისა, რომ შემსრულებლებისთვის არის უფრო მეტი პასუხისმგებლობა, რადგან ტარდება დარბაზში მყოფი მსმენელის გარეშე, მაგრამ ამავე დროს ეყოლება უფრო მეტი მსმენელი – იმიტომ, რომ გავა აჭარის საზოგადოებრივი მაუწყებლის პირდაპირი ეთერით.
წელს იქნება ძალიან საინტერესო და მრავალფეროვანი პროგრამა. აუცილებლად უნდა ვახსენო სულხან ცინცაძის ნაწარმოებები. წელს მისი 95 წლის იუბილეა და შესრულდება გამორჩეული საკვარტეტო მინიატურები, საფორტეპიანო პრელუდიები, რომლებიც არაერთხელ დამიკრავს საზღვარგარეთაც და განსაკუთრებული მოწონებით სარგებლობს ყოველთვის. აჟღერდება ასევე შუმანის კვინტეტი და რაველის ვალსი.
ხაზგასმით უნდა აღვნიშნო, რომ ჩემთან ერთად დაუკრავს სრულიად არაჩვეულებრივი გია ყანჩელის სახელობის სიმებიანი კვარტეტი. ჩვენ არაერთხელ დაგვიკრავს კონცერტებზე ერთად.
ნიკა ბარათელი, მევიოლინე:
– 27 აგვისტოს კონცერტზე ნამდვილად სასიამოვნო საღამო ელოდება ჩვენს მსმენელს, სადაც შევასრულებთ შუმანის კვინტეტს პიანისტ თათა ლიჩელთან ერთად, რომელიც არაჩვეულებრივი პიანისტია. ჩვენ არაერთხელ დაგვიკრავს ერთად.
ასევე შევასრულებთ სულხან ცინცაძის მინიატურებს ქართულ თემებზე, ვინაიდან წელს ბატონი სულხანის 95 წლის იუბილეა და ველოდებით ყველას ტელეეკრანებთან.
პირველად გამოვდივართ როგორც კვარტეტი ამ ფესტივალზე, მაგრამ ბავშვობიდან დავდიოდით, ვუსმენდით, მასტერკლასებს ვესწრებოდით, ყოველთვის აღფრთოვანებულები ვიყავით. ,,ღამის სერენადები” ერთ-ერთი საკმაოდ კარგი დონის ფესტივალია არა მარტო საქართველოში, არამედ მთელ მსოფლიოში.
…
,,ღამის სერენადები” 27 აგვიტოს ბათუმის ილია ჭავჭავაძის სახელობის პროფესიულ სახელმწიფო დრამატულ თეატრში გაიხსნება და მისი პირდაპირი ტრანსლაცია აჭარის საზოგადოებრივი მაუწყებლის ეთერში გაიმართება.
2 და 4 სექტემბერს კი ფესტივალი თბილისში გადმოინაცვლებს.