გუდაურსა და ბაკურიანში წყალი არ არის, დამსვენებლები წყალს მაღაზიებში ყიდულობენ.
საქართველოს მესამე პრეზიდენტი, მიხეილ სააკაშვილი ამ ფაქტს სოციალური ქსელით გამოეხმაურა.
-გუდაურში 5 დღეა წყალი არ არის და ესენი მცხეთაში ქეიფობენ. ამ დროს მე დავყრიდი ყველაფერს, გავიქცეოდი, წავიყვანდი იქ მთელ მთავრობას და გავაკეთებინებდი ყველაფერს ზუსტად 1 საათში. არადა ახლა იკარგება არამხოლოდ შემოსავლები, არამედ იკარგება პერსპექტივები ჩვენი კურორტებისთვის.
ბაკურიანში წყალი თითქმის არავის აქვს, გარდა გამგებლის პირადი სასტუმროსი, გაჩერდა ის პროექტები, რომლებიც მე დავიწყე. სვანეთში მე ავაშენე კურშაველის სიდიდის სათხილამურო კურორტი, რომელიც იქნებოდა ყველაზე დიდი სათხილამურო კურორტი და ყველაზე დიდი ევროპაში. უზარმარზარი რეკლამა გავაკეთეთ, საბაგიროებიც ჩამოვიტანეთ, გააჩერეს, გზებიც გააჩერეს, ყველაფერი, კორუფციის გამო, ივანიშვილის პირადი ბოღმის გამო…
სადაც არის მთის კურორტი, იქ შეუძლებელია, ხალხი იყოს ღარიბი – არც სვანეთში, არც მაღალმთიან აჭარაში, სადაც ასევე გაჩერდა განვითარება, არც გუდაურში, არც ბაკურიანში. ყველგან, სადაც არის სათხილამურო ტრასები, ხალხს აქვს მაღალი შემოსავლები და ხალხი მდიდრდება.
ჩემი გათვლებით, 2019 წლისთვის, 2012-თან შედარებით 8-ჯერ უნდა გაზრდილიყო სათხილამურო კურორტებზე ჩამომსვლელთა რაოდენობა. აქ ძალიან ცოტა ზრდა არის და ამ ყველაფერზე პირადად ეკისრება პასუხისმგებლობა ივანიშვილს, რომელსაც პირადი ბოღმის და სიხარბის გამო უნდა, ფასი დაუგდოს ამ კურორტებს და მერე ყველა ჩაიდოს ჯიბეში.
სასწრაფოდ არის ყველაფერი შესაცვლელი და ინფრასტრუქტურა არის მოსაწესრიგებელი, წინააღმდეგ შემთხვევაში ვკარგავთ შემოსავლებს და პერსპექტივას, – განაცხადა სააკაშვილმა.