,,36 წლის გარდაიცვალა, ზუსტად 36 დღე იცოცხლა შემთხვევის მერე, თავისი ფეხით ავიდა საავადმყოფოს კიბეებზე და ბოლომდე სჯეროდა, რომ იმ მწვანე კაბას კიდევ ჩაიცმევდა…”, – ასე გამოეხმაურა ფეისბუქში მანჩო იოსელიანი დათო ოქიტაშვილის წერილს, სადაც ის გარდაცვლილ მეგობარზე, მომღერალ ლელა სიხარულიძეზე წერს.
ლელა სიხარულიძე გასული საუკუნის 90-იანი წლების ნამდვილი ვარსკვლავი იყო. ძლიერი ხმის გარდა, საოცარი შარმი ჰქონდა, რითიც ყველას ხიბლავდა.
ტრაგედია 1997 წლის ზაფხულში დატრიალდა. მისი ქალიშვილი, თამუნა ამ დღეს ასე იხსენებს:
,,ზაფხული იყო, აგვისტო. მე და ბებია-ბაბუა გურიაში ვიყავი. მოვიდა ნათესავი და გვითხრა, ლელას ხელი დაეწვა და უნდა, რომ დედა მის გვერდით იყოსო. ბებო მიხვდა, რომ რაღაც სერიოზული იყო მის თავს.
17 აგვისტო იყო… მანამდე კი, 12 ივნისს სიზმარი დამესიზმრა – ლელას ხელში ჯვარი ეჭირა, კიბეზე ადიოდა, უცებ ჯვარი გაუვარდა და გატყდა. მაშინ ეს სიზმარი ყველას მოვუყევი…
სახე არ ჰქონდა დამწვარი. ცეცხლის ალი ჰქონდა ნაყლაპი და ორგანოები დაზიანებული. სხეულის 80 პროცენტის თერმული დაზიანება ჰქონდა. მე ერთი კვირა დედასთან ვერ შევედი, არ მინდოდა, დამწვარი მენახა. ემოციურად ცუდად იყო. რომ დამშვიდდა, შემიყვანეს. ეძინა. ისევ შევედი და მორიდებით დავდექი. გადმომხედა. მეშინოდა და ვუცხოობდი…
არ უნდა მაკოცოო? ხელში ამიყვანეს და ვაკოცე. ასეთ მდგომარეობაში ინტერვიუებს იძლეოდა. ერთადერთი პრობლემა ჰქონდა – დამწვრობის რამე კვალი ხომ არ დამეტყობაო. როგორც ვიცი, ნანი ბრეგვაძე დაჰპირდა, საზღვარგარეთ კლინიკაში წაგიყვან და პლასტიკურ ოპერაციას გაგაკეთებინებო. ექიმს უთქვამს, სამ დღეზე მეტს ვერ იცოცხლებსო, დედამ 36 დღე გაძლო… არ უნდოდა სიკვდილი და ექიმთან ერთად იბრძოდა.”
ამბობენ, რომ ლელა სიხარულიძემ ნაადრევი გარდაცვალება თავადაც წინასწარ იგრძნო. როცა დაიღუპა, ოჯახის წევრებმა მისი გადიდებული ფოტოები იპოვეს. ერთხელ ოჯახის წევრებს უთხრა, როცა მოვკვდები ჩემი ძმის სახლიდან თეთრი სასახლით გამაცილეთო, ეს სურვილი აუსრულეს.
,,ყელს შეგაბამ მარგალიტებს…”. თავისი სიმღერები იყო პანაშვიდზე…” – წერს მანჩო იოსელიანი (იხილეთ ლელა სიხარულიძის სიმღერის ვიდეო-ჩანაწერი).