ტელეწამყვანი და პროდიუსერი ირაკლი მაქაცარია ერთ ადგილზე არასოდეს ჩერდება, სულ სიახლეების ძიებაშია, აქვს იდეები, რომელთა ხორცშესხმაზეც ფიქრობს. ამის შესახებ ის “სარკესთან” საუბრობს.
– ირაკლი, წინა ინტერვიუში გვითხარით, რომ უკრაინიდან გქონდათ შემოთავაზება, რომ ერთ-ერთი პროექტის წამყვანი ყოფილიყავით. რა ეტაპზეა მოლაპარაკებები?
– ერთ პროექტზე, რომელიც შემომთავაზეს, თავად ვთქვი უარი, რადგან ის ფორმატი ჩემთვის საინტერესო არ იყო. თუმცა გვაქვს იდეები გადაცემასთან დაკავშირებით და მინდა, რომ განვახორციელო.
2018 წელს ჩემი ერთ-ერთი მიზანია, როგორც პროდიუსმერმა, ფილმი გადავიღო. ეს იქნება ქართულ-უკრაინული რომანტიკული კომედია, რომელშიც მთავარ გმირს ვითამაშებ.
– ამ ყველაფრის პარალელურად გადაცემა “პრაიმშოუშიც” დარჩებით?
– აუცილებლად! “პრაიმშოუ” ძალიან შემიყვარდა. ეს არის შეკრული ოჯახი, მიუხედავად იმისა, რომ თანამწყვანებს ბევრი განსხვავებული თვისება გვაქვს. ალბათ მაყურებლისთვის ის არის საინტერესო, რომ ასეთი კონტრასტულები ვართ.
– შეიძლება ითქვას, რომ ბოლო პერიოდში თქვენს ცხოვრებაში სასიამოვნო სიახლეები ენაცვლება ერთმანეთს.
– ნამდვილად შემიძლია ვთქვა, რომ საკმაოდ დატვირთული, დაძაბული წელი იყო ჩემთვის, თუმცა ვერ ვიტყვი, რომ მთელი წლის განმავლობაში ყველაფერი იდეალურად იყო-მეთქი, რადგან ჩვენს ქვეყანაში ბევრი უსიამოვნო რამ მოხდა. ღმერთს მადლობა, რომ წელმა ისე ჩაიარა, ჩემი ოჯახის ირგვლივ ცუდი არაფერი მომხდარა.
– წელს შესაძლოა თქვენ გვერდით საყვარელი ქალი ვიხილოთ?
– უფალმა უწყის, რა იქნება, მაგრამ დიდი სიამოვნებით შევხვდები სიახლეებს. მაქვს სურვილი, გამოჩნდეს ადამიანი, ვისაც ველი. დაგეგმვით არაფერი გამოდის, მით უმეტეს, ასეთი რამ. ვიმედოვნებ, ჩემს პირად ცხოვრებაში გარდამტეხი წელი იქნება.
– დაბოლოს, მინდა გკითხოთ გავრცელებულ ჭორზე, თითქოს თქვენ და მომღერალი ნინი ბადურაშვილი შეყვარებულები ხართ. ეს მითქმა-მოთქმა მოჰყვა ერთ ფოტოს. აქვს საფუძველი ამ ჭორს?
– ჩვენ შორის არაფერი ხდება. ეს სურათი გადაცემის ფოტოგრაფმა ხუმრობით გადაიღო. მე და ნინი მეგობრები ვართ. ის ძალიან ნიჭიერი, კეითლოშობილი და პოზიტიური გოგოა
მარი მგალობლიშვილი, ჟურნალი “სარკე”