,,მთავარის” ჟურნალისტი ელენე მარგალიტაშვილი ეხმაურება კოლეგის, ,,მთავარის” დილის გადაცემის წამყვანის, ლაშა ნაკაიძის დაკავების ფაქტს, სექსუალურ და ფიზიკურ ძალადობაშია ბრალდებული და წერს:
,,როცა სხვა არხის თანამშრომლები რაღაც ამორალურზე ჩუმდებიან და ისე იქცევიან, არაფერი მომხდარა, ვბრაზდები ხოლმე. არსებობს რაღაცები, რაც უნდა შეიმჩნიო და რასაც გამართლება არ აქვს.
ვერავინ წარმოიდგენს, ჩვენი გუნდის წევრების გარდა, რა საშინელი და გაუსაძლისი შეგრძნებაა, როცა იგებ, რომ შენი ხელებით შეკოწიწებულ, ნაფერებ, სიყვარულით შექმნილ გადაცემაში, რომელიც ამდენი ხანია მთელი მონდომებით ცდილობს, ქალები გააძლიეროს, ძალადობა დაგმოს და ყველანაირ უსამართლობას ხმალამოღებული ებრძოლოს, თურმე ზის კაცი, რომელიც ამის ჩამდენი შეიძლება იყოს.
ბრალდებებს ვერც კი ვიმეორებ, იმდენად შემზარავია ჩემთვის. მნიშვნელობა არ აქვს, ვინ არის, ვინ იყო, როგორი იყო, მიყვარდა თუ არ მიყვარდა, მომწონდა თუ არ მომწონდა – ძალადობას არ აქვს არანაირი “მაგრამ” და “იქნებ”…
ჩემი რუბრიკა, რომლის მიზანიც ქალების გაძლიერება იყო, ხშირად წარუდგენია ლაშას, თან ისეთი სიტყვებით, რომ გული ამჩუყებია – ასეთია ძალადობა, მეგობრებო. ერთი შეხედვით ვერ ცნობ და იქ შეიძლება აღმოაჩინო, სადაც ამქვეყნად ყვეელაზე ნაკლებად ელოდები. საბედნიეროდ (თუ ამ ამბავში შეიძლება რამე იყოს საბედნიერო), ჩემი სამსახური ამბობს და აცხადებს იმას, რისი იმედიც მქონდა და რაშიც ეჭვი არასოდეს შემპარვია – ჩვენთან ძალადობა არ მოსულა და არც მისი რაიმე ფორმით გამართლება.
ამ მართლა საზარელი ამბის მიუხედავად, ვამაყობ, რომ სხვა არხებივით სირაქლემის პოზიცია არ გვაქვს და არც არასოდეს გვექნება. ზუსტად ამიტომ ვარ/ვიყავი ამ და არა რომელიმე სხვა არხის თანამშრომელი. ძალიან მწყდება გული, რომ ჩვენი მზიანი და კეთილი გადაცემის ისტორიაში ასეთი ამბავი ჩაიწერა…”