,,ეკონომიკური ტრანსფორმაციის ცენტრის“ დირექტორს, რამაზ გერლიანს ახლობლები ეძებენ. მისი ძმის, რომანოზ გერლიანის ინფორმაციით, რამაზ გერლიანის გაუჩინარებასთან დაკავშირებით განცხადება ავჭალის პოლიციის სამმართველოში გუშინ შეიტანეს.
მან ,,ინტერპრესნიუსთან“ აღნიშნა, რომ მისი ძმის ტელეფონი ფეისბუქპოსტის გამოქვეყნების შემდეგ გაითიშა.
-როგორც კი პოსტი ვნახე, დავრეკე და ტელეფონი გათიშული ჰქონდა. ავჭალის პოლიციის სამმართველოს წინ არის სადგომი და იქ ვნახეთ ჩემი ძმის მანქანა და იმ განყოფილებაშივე შევიტანეთ განაცხადი. მანქანის კარი ღია იყო, გასაღებიც შიგნით დევს, – აღნიშნა რომანოზ გერლიანმა.
რამაზ გერლიანმა გაუჩინარებამდე ფეისბუქში პოსტი დაწერა და შსს-ს თანამშრომელი, გიორგი გოგნიაშვილი შანტაჟსა და კერძო საკუთრებაში შეჭრაში დაადანაშაულა.
,,ამ ნაგავმა პოლიციელმა ჩემივე ყოფილი ოჯახის წევრის გამოყენებით მოახერხა, ჩემს კერძო საკუთრებაში, ჩემს სამუშაო და ჩემი შვილების სამყოფელ სივრცეში ვირთხასავით შემოღწევა. 14 ნოემბერს შეიარაღებული დამხვდა ჩემს ბინაში და ცრუ მოტივით დაკითხვა მომიწყო, მომაყენა შეურაცხყოფა, განადგურებული ვარ!
როგორც ჩანს, პოლიციის მუნდირის გამოყენებით აგროვებდა პერსონალურ ინფორმაციას, როგორც საპოლიციო სისტემით, ასევე სხვადასხვა საშუალებით, ჩემი და ჩემი ოჯახის წევრების შესახებ. სავარაუდოდ, მოქმედებს დავალება/დაკვეთით. საფუძვლიანია ეჭვია, რომ ჩემ მონაცემებს გადაცემდა/ყიდიდა მესამე პირზე (ებზე). არ არის გამორიცხული, რომ ჩემს მიმართ იყენებდა თვალთვალის, მიყურადების და კონტროლის სხვა სისტემებს… დამარცხება გინდოდათ, მე განადგურებული ვარ. დისკრედიტაცია გინდოდათ – ფსკერზე ვარ. ჩემზე ზეგავლენა და მართვა გინდოდათ – ვერ მიიღებთ”, – წერდა რამაზ გერლიანი.
ამბები.ჯი