მიხეილ სააკაშვილის ადვოკატი, ნიკა გვარამია განცხადებას ავრცელებს:,,ამ წუთებში იმედის ეთერში იუსტიციის ფარჩაკი მინისტრი ამბობს, რომ სააკაშვილმა სიტყვიერი და ფიზიკური შეურაცხყოფა მიაყენა მეთვრამეტე დაწესებულების პერსონალს. ღიად ვაცხადებ, გვაქვს საფუძვლიანი ეჭვი, რომ შეყვანისას მიხეილ სააკაშვილს გაუსწორდნენ ფიზიკურად და ახლა მიზეზს ამზადებენ, რომ დაზიანებები პაციენტის აგრესიით ახსნან.
ამ ეჭვს ამძაფრებს ისიც, რომ ჯერჯერობით მიხეილ სააკაშვილი ჩვენთვის ცნობილ არც ერთ ადამიანს თუ თანამდებობის პირს არ უნახავს პირადად.
ჩვენი ეჭვების გასაფანტად ვითხოვთ მიხეილ სააკაშვილის გლდანის ციხეში ყოფნის და მისი ფიზიკური მდგომარეობის ამსახველი ვიდეოების დაუყოვნებლივ გამოქვეყნებას”.
სახალხო დამცველის წარმომადგენელი გლდანის ციხის კლინიკიდან გამოვიდა და ჟურნალისტებს უთხრა, რომ მიმდინარეობს წარმოება, გამოთხოვილია დოკუმენტაცია და შესაბამის განცხადებას მოგვიანებით გააკეთებენ. მისი თქმით, მიხეილ სააკაშვილი სასწრაფოს მანქანით გადაიყვანეს. მისივე თქმით, სააკაშვილი მანქანიდან არ გადადიოდა და ის ძალით გადაიყვანეს.