ბათუმში, ჭავჭავაძის ქუჩაზე 18 დეკემბერს გვიან ღამით პოლიციელი დაჭრეს. შემთხვევა მაშინ მოხდა, როდესაც საპატრულო პოლიციის ეკიპაჟი მანქანით გადაადგილდებოდა, როდესაც უცნობმა პირმა ისინი გააჩერა. მოულოდნელად 35 წლამდე მამაკაცმა ავტომობილიდან გადასულ ოთარ თავართქილაძეს დანით კისრის არეში ორი ჭრილობა მიაყენა და გაქცევა სცადა. თავდამსხმელს ოთარის მეწყვილე, ავთანდილ მჟავანაძე გაეკიდა და ადგილზევე დააკავა. მამაკაცმა მჟავანაძე ფეხში დაჭრა.
დაჭრილ პოლიციელს ოპერაცია უკვე ჩაუტარდა. როგორც აჭარის ჯანდაცვის მინისტრმა ზაალ მიქელაძემ განაცხადა, მისი ჯანმრთელობის მდგომარეობა სტაბილურად მძიმეა.
41 წლის რაულ თებიძე ბათუმში ხელოსნად მუშაობს და ბედად, სწორედ იქ აღმოჩნდა, სადაც დანაშაული მოხდა. მან ,,პრაიმტაიმს” უამბო:
-შევესწარი, რომ შველას ითხოვდა პატრული… ხალხი იდგა გარშემო და უბრალოდ უყურებდნენ, გეგონება, კონცერტი იყო, არავინ ცდილობდა ხელის შეშველებას. მაშინვე არტერიაზე მოვუჭირე ხელი, ვცდილობდი, მაქსიმალურად შემეჩერებინა სისხლდენა. ჩავსვათ მანქანაში და წავიყვანოთ რესპუბლიკურში-თქო, დავიყვირე. სხვა შემთხვევაში აზრი აღარ ჰქონდა, სანამ საწრაფო მოვიდოდა, დაიღუპებოდა. აჭარის პოლიციის უფროსი მოვიდა უცებ, მე და მან გადავიყვანეთ მანქანით. გზად უკვე გონს კარგავდა, ხრიალებდა და მითხრა, ჩემს ოჯახს დაეხმარეო. ალბათ მეც თანამშრომელი ვეგონე და ოჯახზე ეფიქრებოდა, – მოუყვა ,,პრაიმტაიმს” რაულ თებიძემ.
ოთარ თავართქილაძე მკლავჭიდელია… იგი მკვლავჭიდის ნაკრების წევრია, ამავე დროს პოლიციის თანამშრომელია.