ტელეკომპანია ,,პირველი” ავრცელებს ინფორმაციას, რომ უნგრეთში გარდაცვლილ ჟურნალისტს, ლევან ჩხაიძეს საქართველოში ხვალ, 25 იანვარს ჩამოასვენებენ.
,,ლევან ჩხაიძეს (ჯაკოს) თბილისის საერთაშორისო აეროპორტში პარასკევს, 25 იანვარს, 17:40 საათზე ჩამოასვენებენ. პანაშვიდი 26 იანვარს წყნეთში, ფიროსმანის ქუჩა #6. გამოსვენება კვირას, 27 იანვარს ქაშვეთის ეკლესიიდან 15:00 საათზე”, – წერია განცხადებაში.
,,ხვალ, პარასკევს, 25 იანვარს ჩვენი ჯაკო უკვე თბილიში იქნება. მინდა, ძალიან დიდი მადლობა გადავუხადო საქართველოს ელჩს უნგრეთში, ბატონ ზაზა გოგსაძესა და კონსულს, ბატონ ბექა მაკარიძეს დახმარებისა და მხარდაჭერისთვის. მათ უმოკლეს დროში შეუძლებელი შეძლეს”, – წერს ვატო წერეთელი.
,,ხვალ საღამოს თბილისში იქნება ჩემი ბრჭყვიალა მეგობარი, ჩემი ყველაზე საიმედო მეგობარი… გაფრენამდე სამი ეთერის განმავლობაში სამი დღე ზედიზედ საოცრად ,,ტისკავდა” რესპონდენტებს. სამივე ეთერის განმავლობაში ვწერდი, პასუხი აცადე, კაცო-თქო და მესამე დღეს, როცა ძალიან დაიღალა ჩემი მესიჯებით, მომწერა, ნუ ერევი ჩემს თავისუფლებაშიო. ჩვენი ხალისიანი და იუმორით სავსე ბიჭი”, – დაწერა ფეისბუქში ინგა გრიგოლიამ.