სმს-ით გაკეთებული რეკლამები უკვე ძალიან გამაღიზიანებელი გახდა და იმის ნაცვლად, რომ საზოგადოება მათი კომპანიის მიმართ კეთილად განაწყონ, პირიქით ხდება. არადა სმს-შეტყობინებებით რეკლამას ბევრი მსხვილი თუ შედარებით მცირე ზომის კომპანია მიმართავს.
აქვთ თუ არა ამის უფლება, როგორ დავიცვათ მათი შემოტევისგან თავი ან როგორ უვარდებათ კომპანიებს ჩვენი ტელეფონის ნომრები ხელში, ამის შესახებ პერსონალურ მონაცემთა დაცვის ინსპექტორის აპარატის მთავარი იურისტი თათია კაჭარავა ამბები.ჯი-სთან განმარტებას აკეთებს:
-ხშირად საკუთარი მონაცემების, მათ შორის, საკონტაქტო ინფორმაციის გამოყენებაზე კომპანიებს თავად ვთანხმდებით – მაგალითად, დაგროვებითი ბარათის შევსებისას მაღაზიას ვაძლევთ უფლებას, გამოგვიგზავნოს შეტყობინებები, მობილურ ოპერატორს ვრთავთ ნება, გამოიყენოს ჩვენი ტელეფონის ნომერი პარტნიორი კომპანიების მარკეტინგული მიზნებისთვის და სხვა.
მიუხედავად იმისა, დათანხმდება თუ არა მოქალაქე მისი მონაცემების მარკეტინგის მიზნით გამოყენებას ფიქსირებული თუ სხვა ნებისმიერი ფორმით, მას უფლება აქვს, ნებისმიერ დროს უარი თქვას ამავე მიზნით საკუთარი მონაცემების შემდგომში გამოყენებაზე. ამასთან, კომპანია ვალდებულია შექმნას ამ უფლების გამოყენების ხელმისაწვდომი და ადეკვატური საშუალებები, – აღნიშნავს კაჭარავა.
მისივე განმარტებით, სარეკლამო შეტყობინებას აუცილებლად უნდა ახლდეს უარის თქმის მექანიზმი და მკაფიო მითითება იმაზე, თუ როგორ შეუძლია მოქალაქეს სარეკლამო შეტყობინების მიღების შეწყვეტა – ე.წ. SMS OFF; ელექტრონული ფოსტით გამოგზავნილ სარეკლამო შეტყობინება უნდა იძლეოდეს მასზე უარის თქმის საშუალებას. ე.წ Unsubscribe ღილაკის, ან სხვა საშუალების გამოყენებით.
-მოქალაქეს აქვს უფლება მონაცემთა დამმუშავებელს ნებისმიერ დროს და ნებისმიერი ფორმით მოსთხოვოს, შეწყვიტოს მისი მონაცემების პირდაპირი მარკეტინგის მიზნებისთვის გამოყენება. კომპანია ვალდებულია, ეს მოთხოვნა შეასრულოს მოთხოვნიდან 10 სამუშაო დღის ვადაში. თუ კომპანია უარის მიღებიდან 10 სამუშაო დღის შემდგომ აგრძელებს სარეკლამო შეტყობინებების გამოგზავნას შეგიძლიათ, მიმართოთ პერსონალურ მონაცემთა დაცვის ინსპექტორს, , – აღნიშნავს აპარატის მთავარი იურისტი.
სპეციალისტები ამბობენ, რომ პირდაპირი მარკეტინგის გზით სხვადასხვა პროდუქციის რეკლამირება კომპანიებისთვის ძალიან მცირე დანახარჯებთანაა დაკავშირებული. ვინაიდან ამ კუთხით კანონიც ლიბერალურია.
პერსონალურ მონაცემთა დაცვის ინსპექტორის აპარატის ინფორმაციით, პირდაპირი მარკეტინგის წესების დარღვევის დადგენის შემთხვევაში კანონი ფინანსურ სანქციას ითვალისწინებს. პირველ შემთხვევაზე ჯარიმა 3000 ლარია, 1 წლის განმავლობაში განმეორების შემთხვევაში კი – 10 000 ლარი.
მათივე ცნობით, გასული წლის განმავლობაში პირდაპირი მარკეტინგის წესების დარღვევისთვის 23 ორგანიზაცია დაჯარიმდა. მიმდინარე წელს კი სანქცია 14 ორგანიზაციას დაეკისრა.
ამბები.ჯი