მომღერალ გიო ხუციშვილის ქვრივმა, მუსიკოსმა მაია ჯორჯაძემ ფეისბუქში გარდაცვლილი მეუღლის ფოტო დადო, წარწერით ,,ჩემი ბიჭი”. შარშან აღდგომის პერიოდში იერუსალიმში იყვნენ. 11 ივნისს გიოს წლისთავია.
„პრაიმტაიმთან“ მაია სააღდგომო რიტუალზე ყვება:
– ახლა ძალიან მძიმედ ვარ. მე და გიოს ჩვენი რიტუალი გვქონდა. ღამით ჭავჭავაძეზე, ეკლესიაში გადავიდოდით. ძალიან უყვარდა პასკა, სადაც დაინახავდა, ვუკვეთავდით. მოჰქონდა და მოჰქონდა. სტუმრად სადაც მიდიოდა, ყველგან პასკას გაიყოლებდა.
– არ დაგსიზმრებია?
– მე და გიოს დას ერთ ღამეს დაგვესიზმრა – აქ ვარ, თქვენთან და რა ამბავი ატეხეთო. უცხოები მწერენ, მეუბნებიან, რომ ესიზმრებათ. ყველა ნაბიჯზე ვგრძნობ, რომ აქ არის. იცით, კიდევ როგორი დამთხევევებია – ვიღაც დამირეკავს და მეტყვის, დამესიზმრა და მაგალითად, ქათამი და ბაჟე ითხოვაო ან ნამცხვარი ითხოვაო და მართლაც იმ დღეს ის საჭმელი მაქვს სახლში. ვხვდები, რომ მართლა ჩვენთან ერთადაა.
– ზუკა და ნოდარიკო გიოს სიმღერებს აცოცხლებენ, რა შეგრძნებაა შენთვის?
– თავიდან ძალიან გამიჭირდა გიოს სიმღერებს რომ მღეროდნენ, ახლა უკვე მსიამოვნებს.
– შვილიშვილს გიოს დაარქმევთ?
– აუცილებლად, ამაზე ორი აზრიც არ არსებობს. გიოსაც ეს უნდოდა. ამბობდა, პატარა გიო გაჩნდებაო.
ავტორი თამარ გონგაძე, პრაიმტაიმი