როგორ ვიკვებოთ მარხვაში ისე, რომ ორგანიზმი არ დავაზიანოთ?
ენდოკრინოლოგი ლაშა უჩავა:
-ბოლო დროს ბევრი ე.წ. სამარხვო პროდუქტი შემოვიდა, რომლებიც სხვადასხვა ცხიმით, სხვადასხვა ტიპის დანამატით, კონსერვანტითაა გაჯერებული, რომელთა მიღება ადამინებისთვის მიზანშეწონილი არ არის – თუნდაც ეს იყოს სამარხვო კარაქი, ყველი და ა.შ. ისინი მცენარეულ ზეთებზეა დამზადებული, სამწუხაროდ, ამ პროდუქტების დასამზადებლად ძირითადად პალმის ცხიმი გამოიყენება, რაც კარცეროგენული ნივთიერებაა.
მარხვის პერიოდში ამ პროდუქტების მიღებას ხილისა და ბოსტნეულის მეტი რაოდენობით მიღება, ჯანსაღი კვების პრინციპების დაცვა ჯობია.
შობის მარხვა საკმაოდ ხანგრძლივია, რის გამოც დიდი ხნის განმავლობაში ისეთი აუცილებელი კომპონენტების მიღება არ გვიწევს, როგორიცაა ხორცი, ხორცის პროდუქტები, რძის ნაწარმი, რაც ცილების, ამინომჟავების (ხორცში 9 ტიპის ამინომჟავა შედის, რაც ორგანიზმში არ წარმოიქმნება და არც რომელიმე სახვა პროდუქტიდან შეიძლება მისი მიღება) გარკვეულ დეფიციტს ქმნის, ასევე წონის კლებასა და მეტაბოლური პროცესების დაბალანსებასაც ხელს უშლის. ამდენად ისეთ პროდუქტებს მივირთმევთ, რომლებიც რეკომენდებული არ არის და ორგანიზმს პრობლემებს შეუქმნის.
– ძირითადად პურეულისა და ბურღულეულის მიღება ხდება…
– ცომეულის გარდა, კარტოფილის და მსგავსი ტიპის პროდუქტების, რაც მეტაბოლურ ცვლას არღვევს, იწყება ინსულინრეზისტეტობა იმიტომ, რომ ორგანიზმში დიდი რაოდენობით ნახშირწყლები შედის. ხშირ შემთხვევაში, ამ კვებამ შეიძლება ორგანიზმს გარკვეული ზიანი მიაყენოს.
იმის გამო, რომ ცილოვანი პროდუქტების ჩანაცვლება ამ პროდუქტებით გვიწევს, რა თქმა უნდა, ცილოვანი საკვების ჩანაცვლება სრულად ვერ ხერხდება, ამიტომ მცენარეული საკვებითაც შეგვიძლია მისი შეცვლა, – მაგალითად, ქათმის ხორცს შევუნაცვლოთ ყველაზე მდიდარი მარცვლეული, როგორიც არის ლობიო.
თუ 100 გრამი ხორცი 20 გრამ ცილას შეიცავს, ამ შემთხვევაში, 100 გრ ლობიოში 20-დან-25 გრამამდე ცილაა. ასევე აქტიურად შეგვიძლია ისეთი ბოსტნეულის მიღება, როგორიც არის ყვავილოვანი კომბოსტო, ბადრიჯანი, ყაბაყი – ისინი ცილოვანი კომპონენტებითაა გაჯერებული. ასევე ცილის შემცველია წიწიბურაც.
მარხვის პერიოდში აუცილებელია დავიცვათ ზომიერება.
– ენდოკრინოლოგიური პაციენტებს – შაქრიანი დიაბეტის, ფარისებრი ჯირკვლის, ავტოიმუნური დაავადებებისას რა რეკომენდაციებს მისცემთ?
– არსებობს გარკვეული ტიპის დაავადებები, რომლის დროსაც, უბრალოდ შეუძლებელია პაციენტის სხვადასხვა კომპონენტის გარეშე დატოვება.
ფარისებრი ჯირკვლის პათოლოგიების დროს მკურნალობის განსაკუთრებული მიზანი, ისევე როგორც შაქრიანი დიაბეტისას, სწორი კვებაა. ფარისებრი ჯირკვლის პათოლოგიისას ორგანიზმში კალციუმის დეფიციტიც იქმნება, ამიტომ კვების რაციონში აუცილებელია რძის პროდუქტების ჩართვა და ამ დროს ექიმის რეკომენდაციას სასულიერო პირებიც ითვალისწინებენ, კურთხევას რძის პროდუქტებზე აძლევენ.
რაც შეეხება დიაბეტს, მისი ძირითადი სამკურნალო საშუალება ნამდვილად არის სწორი კვება. ყველა კომპონენტი – ცილები, ცხიმები, ნახშირწყლები, მინერალები, ვიტამინები დაბალანსებულად და რაციონალურად უნდა შევიდეს ორგანიზმში. ამ დროს შესაძლებელია, ხორცის ნაცვლად, რძისა და რძის პროდუქტების მიღება, რომ დიდი რაოდენობით ბურღულეულსა და პურეულს ავცდეთ. ეს მათ ჯანმრთელობის საფრთხეს უქნის.
მარხვა დაბალანსებულ კვებას ნამდვილად არ ეწინააღმდეგება. მთავარია, ნებისმიერ შემთხვევაში – მარხვისას თუ არა მარხვისას გავითვალისწინოთ ზომა და წონა, რომ ჯანმრთელობას პრობლემები არ შევუქმნათ. მივყვეთ ჯანსაღი კვების რეჟიმს და ამით საკუთარ ჯანმრთელობაზე ვიზრუნოთ.
ამბები.ჯი, ლალი ფაცია