სამხრეთ ირანში წყალდიდობას სულ მცირე 19 ადამიანი ემსხვერპლა, დაშავდა 100-ზე მეტი ადამიანი, ინფორმაციას BBC ავრცელებს.
სოციალურ მედიაში ვრცელდება კადრები, სადაც ჩანს, როგორ მიედინება შირაზის ქუჩებში ტალახიანი წყლის ნაკადები. ყველაზე მეტი ადამიანი სტიქიას სწორედ შირაზში ემსხვერპლა, დაზიანდა ასობით შენობა.
წყალდიდობა ირანულ ახალ წელს დაემთხვა, სამთავრობო უწყებების დიდი ნაწილი არ მუშაობდა. სამართალდამცავი ორგანოების განცხადებით, მიმდინარეობს გამოძიება, მოახერხეს თუ არა მობილიზაცია სახელმწიფო სტრუქტურებმა სტიქიასთან გასამკლავებლად.
ფარსის პროვინციის გუბერნატორი ენიათოლა რაჰიმი ამბობს, რომ შექმნილ მდგომარეობას აკონტროლებენ და სამაშველო ჯგუფები განთავსებულია ტერიტორიებზე, რომლებიც სტიქიამ ყველაზე მეტად დააზარალა.
რაჰიმი უსაფრთხოებისთვის მოსახლეობას მოუწოდებს, სახლებში დარჩნენ.
უახლოეს დღეებში ქვეყნის ჩრდილოეთითა და სამხრეთით ძლიერ წვიმას ვარაუდობენ.
წყალდიდობის საშიშროების შესახებ გაფრთხილებულია თითქმის ყველა პროვინცია, მათ შორის დედაქალაქი თეირანი.
ამბები.ჯი