„ომეგა ჯგუფის“ საქმეში გარეულმა ყოფილმა მაღალჩინოსანმა, ლევან ყიფიანმა, მოსამართლის თანდასწრებით დაკითხვის შემდეგ სკანდალური განცხადება გააკეთა და „ომეგა ჯგუფის“ ხელმძღვანელი ზაზა ოქუაშვილი აუდიომასალის ფალსიფიცირებაში დაადანაშაულა.
თბილისის საქალაქო სასამართლოში გამოიკითხვის დასრულების შემდეგ მან ჟურნალისტებს განუცხადა, რომ ოქუაშვილმა მას შესთავაზა, გაეკეთებინათ აუდიოჩანაწერები, რომ ვითომდა მიმდინარეობდა მათზე ზეწოლა.
-მინდა, ბოდიში მოვუხადო საზოგადოებას და ჩემს ოჯახს იმ ვითარების გამო, რაც შეიქმნა ჩემ გარშემო. მე ამ კომპანიაში ვმუშაობდი 2015 წლიდან, ჩემი მოვალეობა იყო, დამემყარებინა კონტაქტი ხელისუფლებასთან. ჩვენ ერთობლივი გეგმა გაგვაჩნდა, ზაზა ოქუაშვილმა ერთ-ერთი ბოლო შეხვედრისას მითხრა, რომ მისი ბიზნესი წნეხს განიცდის უცხოელი პარტნიორებისგან და საქართველოში ბიუჯეტთან დაკავშირებით და მან დახატა სცენარი, რომ ჩაგვეწერა მაკომპრომეტირებელი მასალა შიდა მოხმარებისთვის, რითიც ის დააარწმუნებდა უცხოელ პარტნიორებს, რომ ხელისუფლება მასზე წნეხს ახორციელებდა და იმ ვალდებულებებისგან გაათავისუფლებდა, რაც მათთან ჰქონდა.
მან მითხრა, რომ მივიღებდი დავალიანებას, რომელიც ჩემ მიმართ ჰქონდა თუ ხელს შევუწყობდი ამ ჩანაწერების გაკეთებაში. ეს არ ვიცი, ჩემი მხრიდან იყო მიამიტობის თუ დახმარების სურვილი, მე გადავწყვიტე, ამ თამაშის წესების მიღება და განვახორციელეთ.
მთელი უბედურება ისაა, რომ ის თურმე ამ ჩანაწერებს აკეთებს დიდი ხნის განმავლობაში და ის ჩანაწერები, რომლებიც ერთად გავაკეთეთ, ისიც დამონტაჟებულია… ფარცხალაძესთან მაქვს ნორმალური ურთიერთობამ, – აღნიშნა ყიფიანმა.