25 ოქტომბერს გორში მოკლულ გოგონას დღეს მთელი საქართველო გლოვობს. ფეისბუქში ვრცელდება მოკლული ბავშვის თხზულება, რომელიც გორის მეხუთე საჯაროს სკოლის მასწავლებელმა, გოგონას პედაგოგმა ცირა ხუბულურმა გაავრცელა.
გოგონა თხზულებაში ,,როცა მოწყენილი ვარ…” გარდაცვლილ ბიძაზე, დედის ძმაზე წერს, რომელიც ერთი წლის წინ კასპში მომხდარ ავტოსაგზაო შემთხვევას ემსხვერპლა.
,,მე მოწყენილი ვარ, როდესაც ჩემი ბიძა მახსენდება. მე მწყინს, რომ ის ჩემთან არ არის. ამ დროს ფიქრი იქით მიმდის, რომ ის ძალიან კეთილი იყო. ღმერთმა თავისთან წაიყვანა და ის იქ კარგად იქნება, ამის შემდეგ კარგ ხასიათზე ვდგები”, – წერს ნანიკო ბერიაშვილი.
,,რით ვანუგეშოთ დედაშენი? ჩემო უნიჭიერესი გოგო! ბრძენს ვეძახდი, ისეთი აზრები მოსდიოდა ლამაზ თავში, კლასში ლიდერი იყო, ახლაც სკოლაში შეჯიბრი უნდა ყოფილიყო, ტვინების ბრძოლა და ნანიკო კაპიტანი იყო გუნდის! დიდი დანაკლისი განიცადა მე-5 სკოლამ! ყველამ ერთად გამოვიძიოთ და ვიპოვოთ ის არაკაცი!” – დაწერა ცირა ხუბულური.
შსს-მ ცხელ კვალზე 34 წლის მამაკაცი დააკავა.
მომხდარ ფაქტთან დაკავშირებით გამოძიება სისხლის სამართლის კოდექსის 109-ე მუხლის მე-2 ნაწილის „ბ“ ქვეპუნქტით მიმდინარეობს, რაც წინასწარი შეცნობით არასრულწლოვნის მიმართ დამამძიმებელ გარემოებაში ჩადენილ განზრახ მკვლელობას გულისხმობს.